व्यवस्थापन समूह खोज्दैं महेन्द्रनारायण निधि मेमोरियल हस्पिटल

काठमाडौं—पछिल्लो समय आर्थिक संकट झेलिरहेको बसुन्धरास्थित महेन्द्रनारायण निधि मेमोरियल अस्पतालले नयाँ व्यवस्थापन खोजी गरिरहेको पाइएको छ । अस्पतालले गत मंसिरदेखि नै नयाँ व्यवस्थापन समूहको खोजी गरिरहेको हो ।

अस्पतालका अध्यक्ष कृष्ण वस्तीले आफूहरुले नयाँ व्यवस्थापन ल्याउनका लागि छलफल चलाइरहेको बताए । ‘हामीले अस्पतालमा नयाँ व्यवस्थपन ल्याउनका लागि छलफल चलाइरहेका छौं,’ उनले भने, ‘हेराल्ड कलेज संचालन गरिरहेको समूह र अन्य दुई वटा समूहसँग पनि छलफल चलिरहेको छ ।’ उनकाअनुसार चिकित्सकसहितको टिमलाई अस्पतालको व्यवस्थापन दिने कि भन्ने विषयमा पनि छलफल जारी छ ।

हेराल्ड कलेजका अध्यक्ष कपिल ज्ञवालीले अस्पतालको व्यवस्थापन लिने विषयमा छलफल चलिरहेको पुष्टि गरे । ‘डिल टुंगो लागेको छैन्,’ उनले भने, ‘छलफल चलिरहेको छ ।’ ज्ञवालीले पनि अस्पतालमा नयाँ व्यवस्थापन भित्र्याउने गृहकार्य भइरहेको बताए ।

तर, अस्पतालले अहिलेसम्म व्यवस्थापन समूह भने टुंगो लगाइसकेको छैन । नेपाली कांग्रेसका नेता स्व. महेन्द्रनारायण निधिको स्मृतिमा खोलिएको यो सामुदायिक अस्पताल हो । तर, पछिल्ला केही वर्षदेखि अस्पतालले आर्थिक अभावका कारण संचालनमा समस्या भोगिरहेको छ । अहिले पनि अस्पताल आंशिक रुपमा मात्रै संचालनमा रहेको छ ।

महेन्द्रनारायण निधि सहकारीअन्तर्गत संचालित यो अस्पताल १०० शैय्याको स्वीकृती प्राप्त अस्पताल हो । तीन रोपनी क्षेत्रफलमा फैलिएको उक्त अस्पतालको ६ तलाको भवन रहेको छ । यो अस्पताल नेपाली कांग्रेसका नेता स्व. महेन्द्रनारायण निधिको सम्झनामा उनका छोरा विमलेन्द्र निधिलगायतले स्थापना गरेका हुन् ।

सामुदायिक अस्पतालले यसअघिले स्वास्थ्य तथा जनसंख्या मन्त्रालयबाट पुँजीगत अनुदान पाउँदैं आएका थिए । वि.सं. २०७१/७२ मा अस्पतालले स्वास्थ्य मन्त्रालयबाट ५ करोड पुँजीगत अनुदान पाएको थियो भने वि.सं. २०७३ मा ३ करोड रुपैयाँ अनुदान पाएको थियो ।

तत्कालीन समयमा स्वास्थ्य तथा जनसंख्यामन्त्री गगनकुमार थापाले अनुदान सम्बन्धि निर्देशिका संशोधन गरेर सहर केन्द्रीत अस्पताललाई अनुदान नदिने प्रावधान राखेका थिए । तर, उनले त्यतिबेला उक्त नियम विपरित महेन्द्रनारायण निधि अस्पताललाई भने अनुदान दिएका थिए । स्वास्थ्य मन्त्रालयले दिने अनुदानमा बेथिती बढेपछि त्यसमा सरकारले यो आर्थिक वर्षमा त्यसमा अकुंश लगाइदिएको छ ।

अस्पतालले पछिल्लो समय कर्मचारीहरुलाई तलबभत्ता समेत दिन सकेको छैन । लामो समयदेखि तलब भत्ता रोकिएका कारण कर्मचारीहरुसमेत आन्दोलन गर्दै आएका छन् ।