काठमाडौं—नारायणगढ—मुग्लिन सडकअन्तर्गत चितवनको सिमताल पहिरोमा परेर पुरिएको एक बसमा सवार नर्स पनि बेपत्ता रहेको पाइएको छ । शुक्रबार विहान सिमतालमा पहिरो खसेर वीरगन्जबाट काठमाडौं आउँदैं गरेको प्रदेश ०३००६ ख १५१६ नंं को एन्जल डिलक्स बस र काठमाडौंबाट जाँदै गरेको गणपति डिलक्सको बस त्रिशुलीमा खसेका थिए ।
वीरगन्जबाट काठमाडौं आउँदैं गरेको एन्जल टाभलको बसमा रहेका बाराको देवताल—३ कटहरियाका २२ वर्षीय नर्स अरविन्द पण्डित वेपत्ता रहेका छन् । ‘उहाँ मंगलबार मात्रै घर आउनुभएको थियो, बुधबार बस्नुभयो र बिहीबार साँझ वीरगन्जबाट काठमाडौंका लागि एन्जल ट्राभलको गाडीमा चढ्नुभएको हो,’ उनका भाइ अनिल पण्डितले हेल्थआवाजसँग भने, ‘बस दुर्घटनापछि अहिलेसम्म उहाँ वेपत्ता हुनुहुन्छ । उहाँको खोजविनका लागि आग्रह गर्दछु ।’
पण्डित परिवारको अस्थायी बसोबास भने वीरगन्ज महानगरपालिका—१६ फुलवारी टोलमा रहेको छ । वि.सं. २०५८ फागुनमा जन्मिएका अरविन्दले वीरगन्जको माइस्थान विद्यापीठबाट एलएलसी गरेका हुन् ।
पढाइमा अब्बल रहेका उनले त्यसपछि नेशनल इन्फोटेक कलेज वीरगन्जबाट विज्ञान संकायमा प्लस टु अध्ययन सके । प्लस टु पछि उनले छात्रवृत्तिमा बीएस्सी नर्सिङका लागि चिकित्साशास्त्र अध्ययन संस्थान (आईओएम)अन्तर्गतको महाराजगन्ज नर्सिङ क्याम्पसमा नाम निकाले ।
‘आईओएमबाट बीएस्सी अध्ययन सकेर उहाँ छात्रवृत्ति करार सेवाको तयारीमा हुनुहुन्थ्यो,’ अनिलले भने, ‘त्यही सिलसिलामा डकुमेन्ट बनाउनु छ भनेर काठमाडौं जानुभएको हो ।’ करिअर सुरु गर्न लागेको छोरा दुर्घटनामा परेर वेपत्ता भएपछि अहिले पण्डित परिवार चिन्तामा डुबेको छ ।
पहिरोमा परेका दुई बसमा ६५ जना यात्रु रहेको प्रहरी निष्कर्ष छ । जसमध्ये तीन जना पौडेर बाँच्न सफल भएका छन् भने अन्य चार जनाको शव भेटिएको छ ।तीन बितिसक्दासमेत बस र बाँकी यात्रुको खोजबिन जारी छ ।
