काठमाडौं—चिकित्सा शिक्षा आयोगको निर्देशक सिफारिस समितिका सदस्य प्रा.डा. रमेशकान्त अधिकारीले राजीनामा दिएका छन् । बिहीबार उनले समितिको संयोजक डा. रामकुमार फुयाललाई पत्र पठाउँदैं राजीनामा दिएका हुन् ।
निर्देशक छनोट सिफारिस विरुद्ध अदालतमा मुद्धा परेको र प्रक्रिया नै ढिलाइ भएपछि आफूले राजीनामा दिएको डा. अधिकारीले हेल्थआवाजलाई जानकारी दिए । ‘निर्देशक छनोट सिफारिस विवादमा प¥यो,’ उनले भने, ‘ढिला पनि भएपछि मैले बिहीबार निर्देशक छनोट सिफारिस समितिबाट राजीनामा दिएको छु ।’
डा. अधिकारीले राजीनामा स्वीकृत र अस्वीकृत भएको विषयमा भने आफूले जानकारी पाइनसकेको बताए ।
सरकारले काम सुरु गरेको मितिले १५ दिनसम्म काम सक्ने गरी समिति बनाएको हो । तर, समिति बनेको १३ औं दिनमा अदालतमा मुद्धा परेपछि सिफारिस समितिको म्याद सकिएको थियो । तर, अदालतमा मुद्धा परेका कारण उक्त समितिको वैधानिकतामाथि अन्योल थपिएको थियो ।
सरकारले समितिको संयोजकमा राष्ट्रिय योजना आयोगका सदस्य डा. रामकुमार फुयाल रहेका छन् भने समितिमा प्रा.डा. अधिकारी र प्रा.डा. बुद्धिबहादुर थापा रहेका छन् ।
समितिको वैधानिकतामाथि नै प्रश्न उठिरहेका बेला डा. अधिकारीले राजीनामा दिएका हुन् ।
