काठमाडौं—पार्टी विभाजनपछि आफ्नै नेता उपेन्द्र यादवलाई प्रतिस्थापन गरेर स्वास्थ्य तथा जनसंख्यामन्त्री बनेका प्रदीप यादवले उपेन्द्रले अगाडि बढाएका योजनाहरुमाथि पनि कैची चलाउन थालेका छन् । मन्त्री भएलगतै भेरी अस्पतालको प्रमुख मेडिकल सुपरिटेन्डेन्ट परिवर्तन गर्ने उपेन्द्रको निर्णय बदर गरेका प्रदीपले अहिले योजनाहरुमा पनि कैची चलाउन थालेका हुन् ।
सप्तरीको राजविराजस्थित रामराजाप्रसाद सिंह स्वास्थ्य विज्ञान प्रतिष्ठानलाई उपेन्द्रले १ अर्ब रुपैयाँ बजेट प्रस्ताव गरेका थिए । उनले प्रतिष्ठानको गुरुयोजनाका लागि ९३ करोड रुपैयाँ र अस्पतालका लागि ७ करोड रुपैयाँ प्रस्ताव गरेका थिए । तर, प्रदीपले यो योजनामा प्रस्तावित दुवै बजेट काटिदिएका छन् ।
बाराको महागढीमाई नगरपालिकाको बरियापट्टी आधारभूत अस्पतालको स्तरोन्नतीमा पनि उपेन्द्रले प्रशस्त बजेट प्रस्ताव गरेका थिए । उनले २५ शैय्याको उक्त अस्पताललाई ५० शैय्याको प्रादेशिक अस्पताल बनाउनका लागि ५० करोड रुपैयाँ छुट्याउने प्रस्ताव अगाडि बढाएका थिए । यो बजेटमा पनि प्रदीपले कैची चलाइदिएका छन् । यो पनि उपेन्द्र यादवले उपनिर्वाचनबाट जितेको क्षेत्र हो ।
त्यसैगरी, प्रतिष्ठानबाहेकका संघीय अस्पतालहरुमा कम्तिमा १ महिनासम्म लाश राख्ने सकिने फ्रीजका लागि १÷१ करोड रुपैयाँ बिनियोजन गर्ने प्रस्ताव गरेका थिए । यो बजेट प्रस्तावलाई पनि प्रदीपले परिवर्तन गर्न लगाएका छन् ।
उपेन्द्रले उक्त बजेट पहुँचका आधारमा सामुदायिक र गैरसरकारी स्वास्थ्य संस्थाहरुलाई बाँडिदैं आएको बजेटबाट प्रस्ताव गरेका थिए । तर, पहुँचवालाको चलखेलपछि नवनियुक्त स्वास्थ्यमन्त्री प्रदीपले उक्त बजेट काटेर बजेट बाँड्ने पुरानै शैली ब्युताउन खोजेका छन् ।
