वीरेन्द्रनगर—कर्णाली प्रदेश अस्पताल सुर्खेतको कालागाउँमा पाठेघर सम्बन्धी उपचार गर्न गएकी महिलाको मृत्यु भएको छ । बिहिबार दैलेखको आठबीस नगरपालिका पिपलकोटकी २१ वर्षीया रिजुका बलामीको मृत्यु भएको हो ।
अस्पतालले मृत घोषणा गर्दै शव बुझ्न परिवारलाई खबर गरेपछि पीडित परिवार आक्रोशित बनेका हुन् । जसका कारण प्रदेश अस्पताल सुर्खेतमा तनाव भएको छ ।
९ महिनाको बालिका बाहिर आफन्तलाई छोडेर बिहिबार बिहान बलामी पाठेघर सम्बन्धी उपचारका लागि अस्पताल गएकी थिइन् ।
पाठेघरमा समस्या भएको भन्दै निजी अस्पतालमा चेक जाँच पश्चात् प्रदेश अस्पताल कालागाउँमा पु¥याइएको मृतकका जेठाजु हर्क बलामीले बताए । अस्पताल लगेपछि बिहिबार बिहान डाक्टरले पाठेघरको उपचार सुरु गरेका थिए ।
परिवारलाई भेटघाट गर्न नदिएरै एक्कासी रगत अभाव भयो भन्दै रगत मगाएको र केही समयपछि मृत्यु भएको घोषणा गरेपछि अस्पताल र सेवामा खटिएका डाक्टरको लापरबाहीका कारण उनको मृत्यु भएको मृतकका जेठाजु हर्कले आरोप लगाएका छन् । पीडित परिवारले लापरबाहीका कारण मृत्यु भएको बताउँदै लापरबाही गर्ने व्यक्ति र घटनाको पूर्ण विवरण परिवारले पाउनुपर्ने माग रोखेका छन् ।
अस्पतालका निर्देशक डा. डम्बर खड्काले घटनाको छानविन भइरहेको जानकारी दिए । ‘हामीले घटनाको छानविन गरिरहेका छौं,’ उनले भने, ‘पीडित परिवारसँग छलफल पनि जारी रहेको छ ।’
