काठमाडौं—सांसद अमृतादेवी अग्रहरिले विशेषज्ञ चिकित्सकहरुका लागि लोक सेवा नखुलाइएको भन्दैं कारण माग गरेकी छन् । मंगलबार संसदमा बोल्दै उनले विशेषज्ञ चिकित्सकहरुले लोकसेवा दिन नपाउनुको कारण के हो भनेर प्रश्न गरेकी छन् ।
‘एउटा डाक्टर बन्न, एमडी गर्न र डिएम गर्नका लागि करोडौं लगानी हुन्छ । उहाँहरुको नेपालमै सेवा गर्ने चाहना छ । तर, हाम्रो देशमा त्यो अवसर पाइरहेका छैनन्,’ सांसद अग्रहरिले भनिन्, ‘किनभने, वर्षौ भइसकेको छ लोकसेवा आयोगले लोक सेवा निकालिरहेको छैन । एमडी गरेका, एमडिजीपी गरेका, डिएम गरेका चिकित्सकहरुले लोकसेवा दिन पाइरहेको अवस्था छैन । के कारण हो ? कहाँको जालझेल हो ?’
उनले यसमा मेडिकल माफिया र प्राइभेट हस्पिटलका संचालकहरुको चलखेलप्रति पनि आशंका व्यक्त गरिन् । ‘कही हाम्रो देशका मेडिकल माफियाहरुको चलखेल त होइन् । कही हाम्रो देशका प्राइभेट हस्पिटलका माफियाहरुको चलखेल त छैन । मेडिकल माफिया, प्राइभेट हस्पिटलका माफिया, स्वास्थ्य मन्त्रालयका केही दलालहरु र लोकसेवा आयोगका प्रमुखहरु सबै मिलेर कही यो षड्यन्त्र त गरेको होइन् ?,’ उनले आंशकायुक्त प्रश्न गरिन् ।
सांसद अग्रहरिले देशका केही चिकित्सकहरुको व्यथा सुनेर आफ्नो मुटु नै कामेको बताइन् । ‘आफ्नो देशमा रोजीरोटीको व्यवस्था नभएर विदेशिन बाध्य भएको अवस्था छ । हाम्रो नेपालका शक्ति श्रमिक हामीले उपयोग गर्न नसकेर अरु देशमा गएर आफ्नो बल, वुद्धि, विवेक जाँगर लगाएर त्यो देशको उत्थान गरिरहेको अवस्था छ,’ उनले चिन्ता प्रकट गर्दै भनिन् ।
सांसद अग्रहरिले देशको वौद्धिक वर्ग इन्जिनियर, डाक्टरहरु नेपालमा बस्ने अवस्था नरहेको बताइन् । ‘हामी बाध्य भएर विदेशीनुपर्छ भनेर दुःख पोख्ने गरेका छन्,’ उनले भनिन्, ‘हाम्रो देशका शक्ति श्रमिकहरु विदेश गएपछि हामीहरुलाई लाज लाग्दैन्, हामीहरु मौन भएर बसेका छौं । चिकित्सकहरु पनि विदेशिन बाध्य भएका छन् ।’
डाक्टर, इन्जिनियरजस्ता वौद्धिक वर्गको पलायनको अवस्था हेर्दाखेरी ठूलो सेटिङ लागिरहेको महसुस आफूहरुले गरिरहेको उनले बताइन् । त्यसका कारण सबै मिलेर नेपालको वौद्धिक जनशक्तिलाई विदेश पलायन हुनबाट रोक्नुपर्नेमा उनको जोड थियो ।
