काठमाडौं—पूर्व स्वास्थ्य सचिव डा. प्रवीण मिश्रको निधन भएको छ । भारतको नयाँदिल्लीस्थित म्याक्स अस्पतालमा उपचाररत उनको मंगलबार राति १० बजे निधन भएको उनका आफन्तसमेत रहेका कलेजो रोग विशेषज्ञ डा. अनिल मिश्रले जानकारी दिए ।
महोत्तरी पिपराका डा. मिश्रको ५ मार्चमा म्याक्स अस्पतालमै पित्तनलीको शल्यक्रिया गरिएको थियो । त्यसबाट रिकभर उनी रिकभर भइसकेका थिए ।
डा. अनिलकाअनुसार १३ मार्चमा बाथरुम जाँदा डा. मिश्र लडेका थिए । ‘उहाँ हर्टअट्याक भएर लड्नु भएको रहेछ,’ उनले भने, ‘त्यही दिन हस्पिटल लगेर उपचार सुरु गरियो । त्यही दिन राति दुई बजे डा. मिश्रलाई कार्डियाक एरेष्ट भएको थियो ।
परिवारजनले उनलाई म्याक्समै भर्ना गरेर उपचार गराएका थिए । ‘कार्डियाक एरेष्टका कारण मल्टीपल अग्र्यान फेलियर भएको रहेको छ,’ डा. अनिलले भने, ‘अन्ततः उहाँलाई बचाउन सकिएन ।’ त्यही कारण डा. मिश्रको मंगलबार राति निधन भएको उनले जानकारी दिए ।
डा. मिश्र वि.सं. २०६६ सालमा स्वास्थ्य सचिव भएका थिए । उनले वि.सं. २०७१ साउनसम्म स्वास्थ्य सचिवको जिम्मेवारी सम्हालेका थिए ।
सरकारी सेवाबाट निवृत्त भएपछि उनी बाबुराम भट्टराई नेतृत्वको नयाँ शक्तिमा आवद्ध भएर राजनीतिमा लागेका थिए ।
