काठमाडौं—नयाँ गठबन्धन सरकारमा १७ जना मन्त्रीहरुको मन्त्रालय निश्चित भएको छ । प्रधानमन्त्री पुष्पकमल दाहालले १७ जना मन्त्रीहरुको कार्यविभाजन गरेको पत्र राष्ट्रपति कार्यलय शितलनिवास पठाएका छन् ।
बुधबार साँझ ५ बजे १४ जना नयाँ मन्त्रीहरुले सपथ लिनेछन् । यसअघि सोमबार तीन जनाले सपथ लिइसकेका छन् ।
बालुवाटार निकट स्रोतकाअनुसार एमालेले ८ मन्त्रालय पाएको छ । एमालेबाट उपप्रधानसहित भौतिक पूर्वाधार मन्त्रालयको जिम्मेवारी रघुवीर महासेठ, कानुन, न्याय तथा संसदीय मामिला मन्त्रालयको जिम्मेवारी पदम गिरीले पाएका छन् । यसैगरी, हरि उप्रेतीले रक्षा मन्त्रालय, भगवती चौधरीले महिला, बालबालिका मन्त्रालय, राजेन्द्र राईले खानेपानी मन्त्रालय, दामोदर भण्डारीले उधोग मन्त्रालय, ज्वालाकुमारी साहले कृषि मन्त्रालय, बलराम अधिकारीले भूमी व्यवस्था मन्त्रालय पाएका छन् ।
माओवादी केन्द्रबाट नारायणकाजी श्रेष्ठ उपप्रधान तथा परराष्ट्र, वर्षमान पुन अर्थ, शक्ति बस्नेत उर्जा, रेखा शर्मा संचार र हितबहादुर तामाङ पर्यटन मन्त्रालयको जिम्मेवारी सम्हाल्नेछन् ।
चार मन्त्रालय पाएको राष्ट्रिय स्वतन्त्र पार्टी (रास्वपा)बाट उपप्रधान तथा गृह मन्त्रालय रवि लामिछाने, श्रम मन्त्रालय डिपी अर्याल, शिक्षा मन्त्रालय सुमना श्रेष्ठ र युवा तथा खेलकूद मन्त्रालय विराजभक्त श्रेष्ठले सम्हाल्नेछ ।
सहरी विकास, स्वास्थ्य तथा जनसंख्या, सामान्य प्रशासन, वन मन्त्रालयले बाँडफाँड गरिएको छैन । स्रोतकाअनुसार एमालले दावी गरिरहेको स्वास्थ्य मन्त्रालयमा समाजवादीको पनि दावी भएपछि उसलाई छाडिएको छ । समाजवादीले स्वास्थ्य र सामान्य प्रशासन, जसपाले सहरी विकास र वन मन्त्रालय पाउने सम्भावना छ ।
