काठमाडौं—नयाँ बनेको सत्तारुढ गठबन्धनका दलहरु आन्तरिक छलफलमा जुटेका छन् । दलहरुले आन्तरिक छलफल सकेलगतै गठबन्धन दलहरुको बैठक बसेर बुधबार नै मन्त्रिपरिषद् विस्तार गर्ने तयारी प्रधानमन्त्री पुष्पकमल दाहालको छ ।
उपेन्द्र यादव नेतृत्वको जनता समाजवादी पार्टी (जसपा)को बैठक पार्टी कार्यलय बालकुमारीमा चलिरहेको छ । बैठकले मन्त्रिपरिषद्मा पार्टीको तर्फबाट प्रतिनिधित्व गर्ने मन्त्रीहरुको नाम टुंग्याउने बताइएको छ । जसबाट यादव उपप्रधानसहित परराष्ट्र मन्त्री बन्ने सम्भावना रहेको स्रोतको दावी छ । अन्य मन्त्रीको नाम टुंग्याउन उसको बैठक चलिरहेको छ ।
यस्तै, मंगलबार प्रधानमन्त्री दाहाल र एमाले अध्यक्ष केपी शर्मा ओलीले एकीकृत समाजवादी पार्टीलाई पनि सरकारमा सहभागी हुन आग्रह गरेका छन् । पार्टीका अध्यक्ष माधवकुमार नेपाल निवास कोटेश्वरमा भएको झण्डै दुई घण्टा लामो छलफलपछि नेपालले बुधबार विहान पार्टीको बैठक बसेर निर्णय लिने बताएका छन् ।
एकीकृत समाजवादीको बैठक पूर्व प्रधानमन्त्री दाहालले समाजवादीका वरिष्ठ नेता झलनाथ खनाललाई समेत भेटेका छन् । खनाल गठबन्धनमा सहभागी हुने विषयमा पहिलेदेखि नै सकारात्मक छन् । अहिले ११ बजे समाजवादीको बैठक बस्दैंछ । त्यसभन्दा अघि मंगलबार राप्रपा अध्यक्ष राजेन्द्र लिङ्देन र बुधबार विहान नेपाली कांग्रेसका सभापति शेरबहादुर देउवाले पनि नेपाललाई भेटेका छन् ।
सत्तारुढ घटकहरुबीच गृहमन्त्रालय कसले लिने भन्ने विवाद चलिरहेका बेला नेपाली कांग्रेसले एमाले—माओवादी केन्द्रइतर गठबन्धनको पहल गरिरहेको छ । मंगलबार नेपाली कांग्रेसले रास्वपाका अध्यक्ष रवि लामिछानेलाई प्रधानमन्त्रीको अफर गरेको विवरणहरु पनि सार्वजनिक भएका छन् ।
केही संचारमाध्यमहरुले नेपाली कांग्रेसले एमाले अध्यक्ष ओलीलाई प्रधानमन्त्रीका लागि अफर गरेको समाचार पनि प्रकाशित गरेका छन् ।
यहीबीच प्रधानमन्त्री दाहालमाथि नयाँ गठबन्धनका दलहरुबीच विवाद टुंग्याएर चाँडो मन्त्रिपरिषद् विस्तार गर्नुपर्ने अप्ठ्यारो छ । जसका कारण बुधबार नै मन्त्रीपरिषद् विस्तार गर्ने प्रधानमन्त्रीको तयारी छ । यसो भएमा आजै स्वास्थ्यसहितका मन्त्रालयले नयाँ मन्त्री पाउनेछन् ।
