काठमाडौं—नयाँ सत्ता गठबन्धन बनेसँगै सत्ता साझेदार दलहरुबीच मन्त्रालय भागबण्डाबारे छलफल हुने भएको छ । सोमबार प्रधानमन्त्री पुष्पकमल दाहालले गठबन्धनका सहयात्री दलहरु एमाले, माओवादी केन्द्र र रास्वपाका एक/एक जना मन्त्रीलाई सपथ गराएर नयाँ मन्त्रिमण्डल बनाएका छन् ।
एमालेबाट पदम गिरी, माओवादीबाट हितबहादुर तामाङ र रास्वपाबाट डिपी अर्यालले विनाविभागीय मन्त्रीका रुपमा सपथ लिएका छन् ।
मन्त्रालयको भागबण्डा नटुंगिएका कारण उनीहरुले बिना विभागीय मन्त्रीका रुपमा सपथ लिएका हुन् । मन्त्रालयको टुंगो लगाउन मंगलबार (आज) दिउँसो २ बजे गठबन्धन दलहरुको कार्यदलको बैठक बस्दैंछ । उक्त कार्यदलमा एमालेका महासचिव शंकर पोखरेल, माओवादी उपमहासचिव वर्षमान पुन, रास्वपाबाट स्वर्णिम वाग्ले र जसपाबाट राजेन्द्र श्रेष्ठ छन् ।
गठबन्धनको बैठकले मोटामोटी मन्त्रालयको भागबण्डा टुंगो लगाएपछि शीर्ष नेताहरुको बैठक बसेर त्यसलाई अन्तिम रुप दिनेछन् । त्यसपछि मन्त्रिपरिषद् विस्तार गरेर अगाडि बढ्ने तयारी प्रधानमन्त्रीको छ ।
स्वास्थ्य तथा जनसंख्या मन्त्रालय गठबन्धनका कुन दलले लिने भन्ने विषयमा पनि टुंगो लागिसकेको छैन् । स्रोतकाअनुसार कार्यदलले गर्ने भागबण्डापछि मात्रै स्वास्थ्य मन्त्रालयको कमाण्ड कसले गर्ने भन्ने निश्चित हुनेछ ।
