काठमाडौं–देशको एकमात्र विशिष्टीकृत प्रसुती तथा स्त्रीरोग अस्पतालले आफ्नो सेवा विस्तार तथा अध्ययन अनुसन्धानका लागि अत्याधुनिक भवन निर्माण सम्पन्न गरेको छ । बुधबार ललितपुरको कुपण्डोलमा निर्मित सो भवनको स्वास्थ्य तथा जनसंख्यामन्त्री मोहनबहादुर बस्नेतले उद्घाटन गरेका हुन् ।
अस्पतालका निर्देशक डा. श्रीप्रसाद अधिकारीका अनुसार सो भवन निर्माण नेपाल सरकारको ४३ करोड ७९ लाख ६७ हजार ५ सय ८७ रुपैयाँमा सम्पन्न भएको छ । चार वर्ष लगाएर निर्माण गरिएको सो भवन अण्डरग्राउण्ड पार्किङ र साढे ५ तला रहेका छन् ।
निर्देशक अधिकारीका अनुसार भवनको तल्लो तलामा रिसेप्सन, ओपीडी, फार्मेसी र प्रयोगशाला रहनेछन् । पहिलो तलामा सुरक्षित गर्भपतन सेवा, परिवार नियोजन सेवा, माइनर शल्यक्रिया कक्ष, रिकभरी कक्ष र जनरल वार्ड रहनेछन् ।
त्यसैगरी, दोस्रो तलामा ४ वटा तालिम कक्ष र अध्ययन अध्यापन कक्ष रहनेछ । चौथो र पाँचौ तलमा रहेका ४२ बटा कोठमा १ सय २० जना विद्यार्थी बस्ने गरीको छात्रावास तयार गरिएको छ । सबैभन्दा माथिको पाँचौ तलामा भने भान्सा रहेको छ ।
डा. अधिकारीले नर्सिङ विद्यार्थी मात्र नभएर काठमाडौं बाहिरबाट तालिमका लागि आउने चिकित्सक, नर्स तथा अन्य स्वास्थ्यकर्मीलाई सो अवधिभर छात्रावासको रुपमा प्रायोग गर्न सक्ने प्रायोजनले भवन निर्माण गरिएको बताए ।
परोपकार अस्पतालमा हाल ४ सय ९८ शैय्याबाट स्त्री तथा प्रसुती रोग सम्बन्धी सेवा प्रवाह भइरहेको छ । त्यसैगरी, चिकित्सा विज्ञान राष्ट्रिय प्रतिष्ठानअन्तर्गत २० जना मिडबाइफ्रि, २० जना बिएस्सी नर्सिङ पढाइ संचालनमा छ ।
