काठमाडौं—प्रदेश लोक सेवा आयोग बागमतीले ठूलो संख्यामा पाँचौं तहको स्थायी कर्मचारीका लागि आवेदन माग गरेको छ । सोमबार बागमती प्रदेशको प्रदेश लोक सेवा आयोगले विज्ञान प्रकाशित गर्दै स्वास्थ्य सेवामा मात्रै ३ सय ७९ जना पाँचौं तहका स्वास्थ्यकर्मी माग गरेको छ ।
प्रदेश लोक सेवाले पाँचौ तहको स्टाफ नर्स १ सय ८० सिटका लागि आवेदन खोलेको छ । यसैगरी, हेल्थ असिस्टेन्ट ६४ सिट, रेडियोग्राफर ३३ सिट, ल्याब टेक्नीसियन २९ सिट, फार्मेसी सहायक २७ सिटका लागि लोक सेवाले आवेदन माग गरेको हो ।
आयुर्वेद कविराज १ जना, प.हे.नर्स ९ जना, डेन्टल हाइजिनिष्ट ९ जना, मेडिकल रेकर्डर सुपरभाइजर ८ जना, बायोमेडिकल इन्जिनियर/टेक्नीसियन ९ जना, एनेस्थेटिक सहायक ९ जना र स्वास्थ्य शिक्षा टेक्नीसियन १ पदका लागि पनि आवेदन माग गरिएको छ ।
बागमती प्रदेशको प्रदेश लोक सेवाले पाँचौ तहको स्वास्थ्य सेवासहित अन्य अप्राविधिक र प्राविधिक पदमा गरी १ हजार १ सय १३ जनशक्तिका लागि आवेदन माग गरेको हो । बागमती प्रदेश र स्थानीय तहका विभिन्न सेवा समूहका लागि गरिएको उक्त विज्ञापन समावेसी र खुल्लातर्फका लागि खुलाइएको हो ।
