काठमाडौं—शहीद गंगालाल राष्ट्रिय हृदय केन्द्रको कार्यकारी निर्देशकमा डा. रवि मल्ल नियुक्त भएका छन् । बुधबार बसेको मन्त्रिपरिषद्को बैठकले डा. मल्ललाई केन्द्रको कार्यकारी निर्देशकमा नियुक्त गरेको संचार तथा सूचना प्रविधीमन्त्री एवं सरकारकी प्रवक्ता रेखा शर्माले जानकारी दिइन् ।
यसअघि उनी केन्द्रका निमित्त कार्यकारी निर्देशक थिए । ११ पुसमा स्वास्थ्य तथा जनसंख्यामन्त्री मोहनबहादुर बस्नेतले उनलाई निमित्त कार्यकारी निर्देशकको जिम्मेवारी दिएका थिए ।
६ पुसमा कार्यकारी निर्देशक डा. चन्द्रमणि अधिकारीको कार्यलय सकिएसँगै गंगालाल कार्यकारी प्रमुख पद रिक्त बनेको थियो । त्यसपछि डा. मल्ललाई निमित्त निर्देशकको जिम्मेवारी दिइएको थियो ।
बुधबार केन्द्रको कार्यकारी निर्देशक नियुक्त भएका डा. मल्ल गंगालालका सिनियर कन्सल्ट्यान्ट कार्डियोलोजिष्ट हुन् । उनी २४ वर्षदेखि गंगालालमा कार्यरत छन् ।
डा. मल्ल चिकित्सा विज्ञान राष्ट्रिय प्रतिष्ठान (न्याम्स)मा कार्डियोलोजीका प्राध्यापक समेत हुन् ।
यस्तै, बुधबारकै क्याबिनेट बैठकले नरदेवी आयुर्वेद चिकित्सालय विकास समितिको अध्यक्षमा रमेशचन्द्र न्यौपानेलाई नियुक्त गरेको छ ।
