शहीद धर्मभक्त राष्ट्रिय प्रत्यारोपण केन्द्रमा लगातार दुई कलेजो प्रत्यारोपण

हेल्थ आवाज आईतबार, २०८० पुस २९ गते, १८:१८ मा प्रकाशित

काठमाडौं—भक्तपुरस्थित शहीद धर्मभक्त राष्ट्रिय प्रत्यारोपण केन्द्रमा लगातार दुई कलेजो प्रत्यारोपण गरिएको छ । २७ र २८ पुसमा लगातार दुई वटा सफल कलेजो प्रत्यारोपण गरिएको केन्द्रले जनाएको छ ।

यससँगै हालसम्म केन्द्रले १८ जनाको कलेजो र १ हजार १ सय ८१ जनाको मिर्गौला प्रत्यारोपण गरिसकेको केन्द्रका कार्यकारी निर्देशक डा. पुकारचन्द्र श्रेष्ठले जानकारी दिए ।

उनकाअनुसार केन्द्रले २०८० मा मात्रै १० जनाको कलेजो र १ सय ३८ जनाको मिर्गौला प्रत्यारोपण गरिसकेको छ ।

जटिल शल्यक्रिया मानिने कलेजो प्रत्यारोपण संसारकै सबैभन्दा सस्तोमा गुणस्तरीय सेवा केन्द्रले दिने गरेको उनको भनाइ छ । केन्द्रमा जीवित अंगदाताबाट र मस्तिष्क मृत्यु पश्चात हुने अंगदानबाट समेत प्रत्यारोपण हुने गरेको डा. श्रेष्ठले जानकारी दिए ।