काठमाडौं—स्वास्थ्य तथा जनसंख्या सचिव खगराज बरालले शारीरिक अपांगता भएकी तुलसा बोहोरालाई पायकको स्थानीय तहमा समायोजन मिलाइदिन गुनासो व्यवस्थापन तथा सहजीकरण समितिलाई निर्देशन दिएका छन् ।
आफू अशक्त भएको सबै प्रमाणसहित पटक—पटक पायक पर्ने स्थानमा समायोजनको लागि गुनासो दर्ता गर्दा पनि सुनुवाई नभएपछि बोहोरा बिहिवार तेस्रोपटक स्वास्थ्य मन्त्रालय आइपुगेकी थिइन् । उनी शारीरिक अपांगता भएर पनि समायोजनमा अपायक स्थानमा पर्दा भोग्नुपरेको दुःखबारे बुधवार हेल्थआवाजले प्रकाशित गरेको थियो ।
यो पनि पढ्नुस
‘स्थास्थ्य सचिवले समायोजन व्यवस्थापनका सरहरुलाई बोलाएर पायक पर्ने स्थानमा समायोजन मिलाइदिन भन्नुभएको छ,’ उनले भनिन्, ‘समितिका सरहरुले गुनासो दर्ता नम्बर लिएर मिलाएर पठाउछौं भन्नुभएको छ ।’
यसअघि दुई पटक गुनासो दर्ता गराएकी बोहोराको पछिल्लो समायोजन सूचीमा पनि आफूले चाहेको स्थानमा समायोन भएको छैन । ‘यसपटक चाहीं समस्या समाधान हुन्छ होला भन्ने लागेको छ ।’ सचिवले रोजेकै स्थानमा समायोजन गर्ने आश्वासन दिएसँगै उनी बिहीबारै सुर्खेत फर्किएकी छन् ।
समायोजनअघि भेरीगंगा नगरपालिकामा कार्यरत उनले घरपायक वीरेन्द्रनगर नगरपालिकामा समायोजनका लागि माग गरेकी थिइन् । तर, समायोजन हुँदा झनै अपायक लेकबेसी नगरपालिकामा परेकी थिइन् ।
