काठमाडौं—नेपाल चिकित्सक संघ (एनएमए)ले काठमाडौं मेडिकल कलेज(केएमसी)मा रेजिडेन्सी गरिरहेका डा. विषद दाहालमाथिको निलम्बन फिर्ता गर्ने पत्र पठाइसक्दा पनि उनलाई कलेजमा छिर्न नदिने प्रशासनको कदमप्रति गम्भीर ध्यानाकर्षण भएको जनाएको छ ।
बिहीबार संघले जारी गरेको विज्ञप्तीमा डा. दाहाललाई एक महिनाका लागि गरिएको निलम्बको निर्णय विश्वविद्यालय फिर्ता गर्न कलेज प्रशासनलाई पत्र पठाएको तर प्रशासनले छिर्न नदिएको घटनाप्रति ध्यानाकर्षण भएको जनाएको हो ।
संघले स्पष्टीकरणको मौका समेत नदिएर निलम्बन गर्ने कलेजको निर्णयप्रति आपत्ति समेत जनाएको छ । उसले स्वास्थ्य शिविरका नाममा आवासीय चिकित्सकहरुलाई शैक्षिक गतिविधीबाहेक पीडादायी रुपमा स्वास्थ्य शिविरमा मात्र खट्न लगाउने कार्य चिकित्सा शिक्षा आयोगको नियम विपरित रहेको समेत जनाएको छ ।
‘अनावश्यक रुपमा स्वास्थ्य शिविरमा सामेल नहुने भनेर भनिएकोप्रति कलेज प्रशासनद्वारा कुनै पनि कारणको माग नगरी स्पष्टीकरणको अवसर समेत नदिई निलम्बन गर्दै विज्ञप्ती जारी गर्नुप्रति यस संघको आपत्ति रहेको छ,’ विज्ञप्तीमा छ ।
उसले अस्पतालमा अध्ययनरत आवासीय चिकित्सकमाथि लक्षित गर्दै गरिएको घटनाको उचित छानविन गर्दै अन्यायमा परेका चिकित्सकलाई न्याय प्रदान गर्न सहयोग गर्न समेत आग्रह गरेको छ ।
