स्वदेशी बजारमा हर्मोनल औषधीमा उत्पादनमा एक्लो र जायन्ट कम्पनी हो—नेपाल रेमेडिज प्रा.लि. । गत साउनबाट नेक्स्ट होल्डिङले रुपन्देहीमा फ्याक्टी रहेको नेपाल रेमेडिजको बहुमत सेयरसहित व्यवस्थापन सम्हालेको छ । त्यसपछि यसको नेतृत्व प्रमुख कार्यकारी अधिकृत (सिईओ)का रुपमा अविरल नेपालको काँधमा आइपुगेको छ ।
५० भन्दा बढी उत्पादनहरु रहेको नेपाली रेमेडिजका २२ देखि २५ वटा प्रडक्ट हर्मोनल छन् । कम्पनीका डाइलोकेयर, फेम्प, प्रोजीमेड, एडिल—२, नोरेथ, च्वाइस, ¥यापजोल, रेमिप्राजोललगायतका उत्पादनहरु बजारमा लोकप्रिय छन् । यही कम्पनीको नेतृत्व गरिरहेका छन्, २८ वर्षीय युवा अविरल । अविरलको युवा जोश कम्पनीलाई एक डेढ वर्षभित्रै नयाँ उचाइमा लैजाने छ । त्यही कारण उनी त्यसका लागि योजना, लगानी र जनशक्तिको क्षेत्रमा काम गरिरहेका छन् ।
‘एकदेखि डेढ वर्षभित्र हामीसँग १ सय ५० प्रडक्टहरु बजारमा हुनेछन्,’ उनी भन्छन्, ‘हर्मोनमा केही प्रडक्ट थप्छौं । जनरल प्रडक्टहरु बढाउँछौं ।’ सन् २०२० मा सुरु भएको अल्फा प्लस भेन्चर्सअन्तर्गतको नेक्स्ट होल्डिङको फर्माबाहेक हाइड्रो पावर, डिस्टीलरी, रेम वर्क (को—वर्किङ स्पेश कम्पनी), प्राइभेट इक्वीटीलगायतमा लगानी छ । नेक्स्ट भेन्चर्सको म्यानेजमेन्ट रहेर नेतृत्व गरिरहेका सबैजना ३५ वर्षभन्दा कम उमेर समूहका युवाहरु छन् । तीनै युवाहरुको समूहका एक सदस्यका रुपमा अविरल फर्मा कम्पनीको कार्यकारी तहमा पुगेका हुन् ।
अविरल जति फाइनान्स रुचाउँछन्, त्यति नै उनलाई मनपर्ने क्षेत्र फर्मा पनि हो । त्यही कारण आफू फर्मा कम्पनीको नेतृत्व गर्न आइपुगेको उनी बताउँछन् । ‘नेपाल रेमेडिज मलाई पनि रुचि भएको कम्पनी हो । किनभने, फर्मास्युटिकल्स मेरो पहिलेदेखि नै रुचि भएको क्षेत्र पनि थियो,’ उनी थप्छन्, ‘प्रडक्टसनको क्षेत्र भएकाले इम्पोर्टमा यसको एकदमै धेरै सम्भावनाहरु छन् ।’
वि.सं. २०५१ साल चैतमा काठमाडौंको पिङ्गलास्थान जन्मिएका हुन्, अविरल । बुवा रमेशप्रसाद नेपाल र आमा बसन्ती नेपालका दुई सन्तानमध्ये उनी जेठा हुन् । उनका बुवा रमेश जीवन विज्ञानमा आवद्ध छन् । अविरलको प्रारम्भिक शिक्षा पिङ्गलास्थानको सत्य साई स्कुलमा भएको हो । वि.सं. २०६७ सालमा उनले त्यही स्कुलबाट विशिष्ट श्रेणीमा एसएलसी उत्तीर्ण गरे । भनिन्छ, ‘हुने विरुवाको चिल्लो पात’ अविरलको सानैदेखि फाइनान्सप्रति असाध्यै अनुराग थियो ।
‘मेरो बच्चादेखि नै इन्टेष्ट फाइनान्समै भयो,’ उनले भने । महालक्ष्मीथानको लुम्बिनी इन्टरनेशनल कलेजमा उनले व्यवस्थापनमा ए लेभल अध्ययन सुरु गरे । वि.सं. २०६९ मा उनले त्यहीबाट ए लेभल उत्तीर्ण गरे ।
लगतै उनले एपेक्स कलेजमा बीबीए—बीआई ज्वाइन गरे । सन् २०१७ मा बीबीए—बीआईको अध्ययन सकेपछि उनले केही समय नेपालमै काम गरे । त्यसपछि उनी सन् २०१९ मा थप उच्च शिक्षाका लागि अमेरिका गए । अमेरिकाको द ओहियो युनिभर्सिटी फिसर कलेज अफ बिजनेशबाट सन् २०२० मा उनले फाइनान्समा माष्टर्स सके । अमेरिकामा माष्टर्स सकेपछि उनले संसारकै सबैभन्दा ठूलो इन्भेष्टमेन्ट कम्पनी जेवी मोर्गन एसेट म्यानेजमेन्टमा केही समय अनुभव संगाल्ने अवसर पाए । अमेरिकाकै फाइनान्सका टप फाइभ कलेजमा पर्ने भएकाले उनको कलेजमै जबका अफरहरु बोकेर एकसे एक कम्पनीहरु आइपुगिरहेका हुन्थे ।
तर, सन् २०२१ मा अन्त्यतिर उनी नेपाल फर्किए । अवसरको खानी मानिने अमेरिकाबाट उनी के कारणले नेपाल फर्किए । भन्छन्, ‘सबैको आ—आफ्नै ओरेन्टेसन हुँदोरहेछ । म अमेरिका जाने बेला नै आउँछु नै भनेर गएको मान्छे हो । तर, मलाई यही फर्केर केही गर्नु थियो ।’ उनी पारिवारिक कारणले पनि आफू अमेरिकामा बस्न नसकेको बताउँछन् ।
‘नेपालमा आफ्नै वरपर पनि थुप्रै अवसरहरु छन्,’ उनी थप्छन्, ‘यहाँ पनि सजिलै गर्न सक्ने देखेकाले नै फर्किएको हुँ ।’ विषय पनि फाइनान्स र रुचि पनि क्यापिटलमा भएकाले अमेरिकाबाट फर्केर आएपछि उनी प्रभु क्यापिटलमा आवद्ध भए । सिनियर रिसर्च एनालाइसिष्टका रुपमा त्यहाँ प्रवेश गरेका उनले रिसर्च डिपार्टमेन्ट हेड र स्कीन म्यानेजरका रुपमा काम गरे ।
प्रभु क्यापिटलमा अविरलले म्युचअल फण्डसमेत हेरे । झण्डै साढे दुई वर्ष काम गरेपछि उनले प्रभु क्यापिटल छोडे । प्राइभेट इक्वीटीमा रुचि भएकाले उनी अल्फा प्लस भेन्चर्स लिमिटेडमा हेड अफ इन्भेष्टका रुपमा आए । ‘मैले प्रभुमा लगभग डेढ सय करोडको फण्ड म्यानेजमेन्ट गरेको हुँ,’ उनले भने, ‘अहिले म अल्फा प्लस भेन्चर्समा छु । यहाँ हामी २ सय करोडको फण्ड क्लोज गर्ने चरणमा छौं ।’ अल्फा भेन्चर्सले नयाँ—नयाँ लगानी क्षेत्रहरुमा लगानी गर्दै गइरहेको छ । अविरल अल्फा, नेक्स्टसँगै अहिले नयाँ लगानी गरेको फर्मा कम्पनी नेपाल रेमेडिजलाई अगाडि बढाइरहेका छन् ।
