काठमाडौं महानगरपालिकामा तीन वटा वडाबाट स्वास्थ्य विमा सुरु हुँदैं

काठमाडौं–स्वास्थ्य विमा वोर्डले महानगरापालिकाका वासिन्दाहरुलाई पनि स्वास्थ्य विमामा आवद्ध गर्ने भएको छ । काठमाडौं महानगर र स्वास्थ्य विमा वोर्डबीच प्रारम्भिक चरणको सहमति भएर काम सुरु भएको वोर्डको योजना शाखाका विकेश मल्लले जानकारी दिए ।

‘महानगर र वोर्डबीच प्रारम्भिक सहमति भएर काम अगाडि बढेको छ,’ उनले हेल्थआवाजसँग भने, ‘त्यसका लागि महानगरले २९ वटा वडामा दर्ता सहयोगी पनि राखिसकेको छ ।’

महानगरले काठमाडौंका तीन वटा वडाबाट पहिलो चरणमा स्वास्थ्य विमा कार्यक्रम सुरु गर्ने तयारी रहेको छ । पहिलो चरणमा वडा नम्बर ८, २९ र ३० रहेका छन् । वडा नम्बर ८ मा रामघाट प्राथमिक केन्द्र, २९ र ३० मा सहरी स्वास्थ्य क्लिनिकलाई प्रथम विन्दु तोक्ने काम भएको छ । ‘तीन वटा वडाबाट सुरु गर्ने तयारी भएको छ,’ मल्लले भने, ‘८ नम्बरमा सबै तयारी भएको छ । २९ र ३० मा महानगरले मेडिकल अधिकृत राख्ने तयारी भएको हुँदा केही दिन समय लागेको हो ।’

स्वास्थ्य विमा वोर्ड र काठमाडौं महानगरबीचको प्रारम्भिक सहमतिमा यो महिनाभित्र सुरु गरिसक्ने उल्लेख छ । काठमाडौं महानगरमा विमा सुरु भएसँगै विमा लागु भएका पालिकाको संख्या ७ सय ५१ पुग्नेछन् । यसअघि ललितपुर महानगरले स्वास्थ्य विमा सुरु गरिसकेको छ । अब स्वास्थ्य विमामा आवद्ध हुन बुढानिलकण्ठ र नागार्जुन नगरपालिका बाँकी रहनेछन् ।

ती पालिकाहरुमा पनि तयारी भइरहेको बोर्डका कार्यकारी निर्देशक डा. दामोदर बसौलाले जानकारी दिए । ‘काठमाडौंमा सुरु भएपछि दुई वटा पालिकामा बाँकी रहन्छ,’ उनले भने ‘ती पालिकामा पनि तायरी भइरहेको छ । प्रथम विन्दु तयार हुना साथ सम्झौता हुन्छ ।’