जुम्ला—जुम्लामा टाइफाइड विरुद्धको खोप लगाउन १ सय २० जना स्वास्थ्यकर्मी र २ सय ४० जना स्वयंसेवक गरी ३ सय ६० जना जनशक्ति परिचालन गरिने तयारी गरिएको छ । नेपाल सरकारले भूकम्प प्रभावित जिल्लामा खोप अभियान २०८०–८१ अन्तर्गत जुम्लाका (१६ देखि ४५ वर्ष उमेर समुह) ५४ हजार ६ सय ३५ जना नागरिकलाई टाइफाइड विरुद्धको खोप लगाईने तयारी गरेको छ ।
जुम्लाको जनसंख्या करिब १ लाख २० हजार बढी छ । जसमध्ये खोप उमेर समूहका साढे ५४ हजारलाई खोप लगाउने तयारी छ ।
भुकम्प प्रभावित जाजरकोट, रुकुमपश्चिम, जिल्लासँग सिमा जोडिएका जिल्लामा खोप अभियान चलाउने राष्ट्रिय कार्यक्रमअनुसार जुम्लामा पहिलो चरण ८ देखि १० पुससम्म र दोस्रो चरण ११ देखि १३ पुससम्म खोप अभियान सञ्चालन गरिने जिल्ला जनस्वास्थ्य कार्यालय जुम्लाका प्रमुख कृष्ण सापकोटाले बताए । ‘पहिलो चरणमा कनकासुन्दरी, सिंजा र हिमा गाउँपालिकामा खोप अभियान सञ्चालन गरिने छ । दोस्रो चरणमा चन्दननाथ नगरपालिका, गुठिचौर, पातारासी, तातोपानी र तिला गाउँपालिकामा खोप लगाइने छ,’ उनले भने ।
पहिला कुनै खोप लगाएर एलर्जी भएका, एड्स भएको अवस्था, हालै उच्च ज्वरो, सिकिस्त बिरामी भएका, गर्भवती महिला र ६ महिनाभित्र स्तनपान गराई रहेका महिलालाई भने टाइफाइड विरुद्धको खोप लगाइने छैन ।
रोग प्रतिरोधात्मक क्षमता बढाउन टाइफाइड विरुद्धको खोप अनिवार्य हो भन्ने कुरा जनचेतना अभिवृद्धिमा जोड दिन जरुरी रहेको उनले बताए । जुम्लामा मंगलबार आयोजित सरोकारवालाको बैठकले खोप अभियानलाई प्रभावकारी बनाउने साझा प्रतिबद्धता गरेका छन् । गाउ—ँगाउँमा जनचेतना अभिवृद्धि, प्रचारप्रसार, शान्ति सुरक्षा, खोप केन्द्र छनोट, खटिने जनशक्तिलाई तालिम लगायत विभिन्न सवालमा समन्वय सहकार्य र सहयोग गर्ने सरोकारवालाले प्रतिबद्धता जनाएका हुन् ।
जिल्ला समन्वय समितिका प्रमुख गौरीनन्द आर्चायले जुम्लाका साढे ५४ हजार नागरिक नछुट्ने गरी टाइफाइड विरुद्धको खोप अभियान सम्पन्न गर्न पत्रकार, नागरिक समाज, सुरक्षा निकाय, जनप्रतिनिधि सबैले सहयोग गर्नुपर्ने बताए । उनले भने, ‘पूर्वतयारीलाई मजबुत बनायौँ । भूकम्प प्रभावित जिल्लामा टाइफाइडको प्रकोप फैलिन सक्ने जोखिम न्यूनीकरणका लागि खोप अभियान सञ्चालन गरिएको हो ।’
यसअघिनै ६ महिनादेखि १५ वर्ष मुनिका बालबालिकालाई टाइफाइड विरुद्धको खोप लगाई सकेकाले अभियानअन्तर्गत १६ देखि ४५ वर्षमुनिका नागरिकलाई खोप लगाइने छ ।
प्रमुख जिल्ला अधिकारी जयकुमार घिमिरेले खोप अभियान सफल बनाउन र सबै नागरिकलाई खोपको पहुँचमा ल्याउन सुरक्षा निकायले भरपुर सहयोग गर्ने बताए ।
विश्व स्वास्थ्य संगठन (डब्लुएचओका) प्रतिनिधि तथा डाक्टर पुरुषोत्तम सेडाइले कुनै पनि क्षेत्रमा भूकम्पलगायतका विपद्पछि टाइफाइडको प्रकोप फैलिन सक्ने जोखिमलाई मध्यनजर गर्दै सरकारले खोप अभियान सञ्चालन गरेको बताए । ‘रोग प्रतिरोधात्मक क्षमता बढाउन टाइफाइड विरुद्धको खोप लगाउन अनिवार्य छ । खोपबाट कोही नछुटोन्, कोही नदोहोरिउन भन्दै शतप्रतिशत नागरिकलाई खोपको पहुँचमा पु¥याउने सरकारको लक्ष्य छ,’ उनले भने, ‘सोहीअनुसार जुम्लाका खोप लक्षित उमेर समूहका सबैलाई खोप लगाउन आबश्यक समन्वय सहकार्यमा जोड दिन जरुरी छ ।’
