विराटनगर—मोरङको बेलवारी नगरपालिका–३ स्थित १५ शैय्याको कोशी प्रदेश प्रहरी अस्पताल रातारात सारेर सुनसरीको इनरुवामा लगिएको छ । मंगलबार मध्यराति संचालनमा आएको ९ महिनापछि स्थानीय पालिकासँग कुनै समन्वय र सहकार्य नगरी प्रहरीले संचालन गरेको प्रदेशस्तरीय प्रहरी अस्पताल इनरुवास्थित जिल्ला समन्वय समितिको कार्यालयमा सारिएको हो ।
नेपाल प्रहरीको व्यवस्थापनमा बेलवारी सञ्चालित अस्पताल १० फागुन २०७९ मा तत्कालीन आईजिपी धिरजप्रताप सिंहले उद्घाटन गरेपछि संचालनमा आएको थियो । यहाँ दैनिक ३० जनासम्म ओपीडीमा बिरामी आउने गरेको अभिलेखमा देखिन्छ ।
अस्पतालमा ९ औं तहका चिकित्सकसहित ६० जनाको दरबन्दी रहेको थियो । ९ औं तहका एमडिजिपी गरेका डाक्टर डिएसपी, दुई जना मेडिकल अधिकृत र स्वास्थ्यकर्मी अस्पतालबाट सेवा दिदैं आएका थिए । जनप्रतिनधी, राजनैतिक दल र स्थानीयलाई जानकारी नदिइकन प्रहरीले एक्कासी अस्पताल सारेर सुनसरी लगेपछि यहाँका स्थानीय आक्रोशित बनेका छन् ।
बुधबार बेलबारी नगरपालिकाले प्रदेश अस्पताल अगाडि पत्रकार सम्मेलन गरेर प्रदेश प्रहरी अस्पताल साविककै स्थानमा कायम हुनुपर्ने माग राखेको छ । त्यस क्षेत्रका प्रदेशसभा सदस्य ज्ञानेन्द्र सुवेदी, मानबहादुर लिम्बू, गीता तिम्सिना, बेलवारी नगरपालिकाका उपमेयर नितु थापा, उद्योग वाणिज्य संघ र स्थानीय राजनीतिकर्मीको टोलीसहितको उपस्थितीमा अस्पताल सार्ने निर्णाय सच्याएर यथास्थानमा प्रदेश अस्पताल हुनुपर्ने उनीहरुले माग गरेका छन् ।
बेलवारीमै प्रदेश प्रहरी अस्पताल हुनुपर्ने माग राख्दैं आयोजित पत्रकार सम्मेलनमा सहभागीहरु ।
अस्पताल साविककै स्थानमा कायम हुनुपर्ने बेलवारी नगरपालिकाकी उपप्रमुख नितु थापाले बताइन् । ‘प्रदेश प्रहरी अस्पतालको लागि नगरपालिकाले प्रत्येक वर्ष बजेट विनियोजन गर्दै आएको छ । चालु आर्थिक वर्षको लागि पनि १० लाख रुपैयाँ बजेट विनियोजन गरिएको थियो । अस्पतालका लागि नगरपालिकाले पनि सहयोग गर्दै आएको थियो । तर, हामीलाई कुनै जानकारी नदिई यसरी मध्यरातमा हस्पिटल सारिएको छ । यो मान्य हुने छैन,’ उनले भनिन्, ‘हामीले १० करोड रुपैयाँ बढी लगानी गरेर बेलवारी ४ बुधबारेमा प्रदेश अस्पतालका लागि सुविधासम्पन्न भौतिक संरचना निर्माणको काम अन्तिम चरणमा पुगेको छ । भौतिक सरंचाना सुविधासम्पन्न ठाउँमा लैजाने तयारी गरिएको थियो । यसरी रातारात बन्दै प्रदेश प्रहरी अस्पताल सारिनु लगत छ । यो तत्काल साविकको स्थानमा हुनुपर्दछ ।’
नगरपालिकाले प्रदेश प्रहरी अस्पतालको लागि चिकित्सकको आवासको व्यवस्थापन, अस्पतालको रंगरोगन, अस्पतालमा एयर कण्डिसनसमेत जडान गरिसकेको उनले बताइन् ।
पत्रकार सम्मेलनमा प्रदेश सांसद ज्ञानेन्द्र सुवेदीले बेलवारीमै प्रदेश प्रहरी अस्पताल ल्याउनुपर्ने बताए । ‘त्यसको लागि पहल र मुख्यमन्त्रीको ध्यानाकर्षण गराउने काम पनि भइसकेको छ,’ उनले भने ।
प्रदेश अस्पतालको लागि बेलवारी ४ मा बनाएको निमार्णको अन्तिम चरणमा रहेको संरचना ।
अस्पतालले जग्गा उपलब्ध गराउन स्थानीय सरकारसमक्ष प्रस्ताव गरेको थियो । त्यसबारे छलफल गरी पूर्वनगर प्रमुख तथा वर्तमान कोशी प्रदेशसभा सदस्य ज्ञानेन्द्र सुवेदीले आफ्नै दुई विगाहा जग्गा दिने सहमति जनाएका थिए । ‘मैले आफ्नै जग्गा दिने भनेको हुँ । त्यो नभए अहिले नगरपालिकाले निर्माण गरिरहेको नगर अस्पतालमै प्रहरी अस्तपाल संचालन गर्न प्रस्ताव समेत गरिएको थियो । तर, उहाँहरूले सल्लाह नै नगरी रातारात भाग्नुभएछ,’ उनले भने ।
कोशी प्रदेश प्रहरी कार्यालय प्रमुख डीआईजी राजेशनाथ बास्तोलासँग बुझ्दा केन्द्रीय कार्यालयबाट निर्देशन भएबमोजिम नै अस्पताल सारिएको जवाफ पाएको सांसद सुवेदीले सुनाए । यता डिआईजी बाँस्तोलाले प्रदेशभित्रै अस्पताल सारिएको बताए । ‘अन्तर प्रदेशमा सारिएको होइन् । यही प्रदेशको अर्को जिल्लामा सारिएको हो,’ उनले भने, ‘साँघुरो संरचना र पूरानो भवनबाट सेवा प्रवाहमा समस्या भएपछि प्रहरी प्रधान कार्यालयबाट निर्देशन बमोजिम अस्पताल सारिएको हो ।’
