बुटवल—बुटवलस्थित सिद्धार्थ बाल तथा महिला अस्पताल (आम्दा)मा उपचारका क्रममा एक सुत्केरीको मृत्यु भएको छ । मंगलबार गुल्मीकी ३२ वर्षीया भवानी रास्कोटीको उपचार क्रममा मृत्यु भएपछि आक्रोशित समूहले अस्पतालमा मेसु डा. राजेन्द्र बस्याललाई प्रहरी प्रशासनकै उपस्थिती रहेको बैठकमा निर्घात कुटपिट गरेका छन् ।
रास्कोटीलाई सोमबार उपचारका लागि अस्पताल भर्ना गरिएको थियो । त्यही दिन अस्पतालमा उनले शल्यक्रियामार्फत स्वस्थ शिशुलाई जन्म दिएकी थिइन् । तर, मंगलबार ‘पल्मोनरी इम्बोलिजम’का कारण उनको मृत्यु भएको अस्पताल स्रोतले जनाएको छ ।
रास्कोटीको मृत्युपछि उनका आफन्तहरु फर्किने तरखरमा थिए । त्यही क्रममा बाहिरबाट आएको एक समूहले अस्पताल र चिकित्सकको लापरवाहीले मृत्यु भएको भन्दैं अवस्थालाई भड्काएको थियो ।
विवादलाई साम्य बनाउन बिरामीका आफन्तसँग मेसु डा. बस्याल, प्रहरी प्रशासनका प्रतिनिधीहरु वार्तामा बसेका थिए । त्यही बेला केही मान्छेहरु प्रवेश गरेर डा. बस्यालमाथि निर्घात कुटपिट गरेका हुन् । कुटपिटबाट उनको टाउकोमा चोट लागेको छ ।
‘छलफलकै क्रममा उहाँ (डा. बस्याल)माथि हातपात भयो, उहाँ त्यही ढल्नुभयो । उहाँको टाउकोमा चोट लागेको छ,’ अस्पतालमा चिकित्सक तथा नेपाल चिकित्सक संघ लुम्बिनीका महासचिव डा. सन्तोष पोखरेलले हेल्थआवाजसँग भने, ‘अहिले उहाँको लुम्बिनी प्रादेशिक अस्पतालको आईसीयुमा उपचार भइरहेको छ ।’
मंगलबार घटनापछि बिरामीका आफन्तहरु फर्किने तरखर गरिरहेका बेला बाहिरबाट आएका केही मानिसहरुले अवस्थालाई उत्तेजित पारेका उनले बताए । ‘उनीहरुले ५० लाख रुपैयाँ क्षतिपूर्तिको माग गर्दै अस्पताल तोडफोड तथा मेसुमाथि हातपात गरेका हुन्,’ उनले भने ।
घटनापछि नेपाल चिकित्सक संघ लुम्बिनी अञ्चल शाखाले वार्तामा बसिरहेको अवस्थामा प्रहरी प्रशासनकै अगाडि डा. बस्यालमाथि भएको कुटपिटको घोर निन्दा गरेको छ ।
‘यस नेपाल चिकित्सक संघका आजीवन सदस्य तथा आम्दा नेपाल सिद्धार्थ बाल तथा महिला अस्पतालका मेडिकल सुपरिटेन्डेन्ट डा. राजेन्द्र बस्यालज्यूमाथि वार्तामा बसिरहेको अवस्थामा प्रहरी प्रशासनकै अगाडि विभिन्न समूहहरुले गुण्डागर्दी र दादागिरी शैलीमा कुटपिट गरेकोमा यस चिकित्सक संघ घोर निन्दा एवं भत्र्सना गर्दछ,’ संघका अध्यक्ष डा. डिवी खत्री र महासचिव डा. पोखरेलद्वारा जारी संयुक्त विज्ञप्तीमा छ, ‘कानुनलाई हातमा लिएर मानव अधिकारको जघन्य उल्लंघन गर्दै प्रशासनकै अगाडि यस्तो अपराधिक कार्य हुनु यस समाज र देशका लागि पनि संवेदनशील कुरा हो ।’
संघले कुटपिटमा संलग्नलाई पक्राउ गरेर तत्काल कानुनअनुसार कारवाही गर्न समेत जोडदार माग गरेको छ ।
