काठमाडौं—जनतालाई स्वास्थ्य सेवा निःशुल्क बनाउने भाषण गर्दै आएका स्वास्थ्य तथा जनसंख्यामन्त्री मोहनबहादुर बस्नेत निजी अस्पतालको चंगुलमा परेर नियोजित रुपमा नै देशकै ठूलो वीर अस्पतालको सेवा खुम्च्याउन तल्लीन रहेका छन् । उनले गरिब जनताको आशाको केन्द्र रहेको वीर अस्पतालबाट नियोजित रुपमा एकैपटक २ सय २१ करार चिकित्सक, नर्स र स्वास्थ्यकर्मी निकालेर त्यसको सुरुवात गरेका छन् ।
सो जनशक्ति निकालिएसँगै अस्पतालको सेवा पूर्ण रुपमा प्रभावित भएको छ । अस्पतालले दिएको जानकारी अनुसार करारका कर्मचारी हुँदा ५९ शैय्या आईसीयु संचालन रहेकोमा अहिले त्यो घटेर २४ शैय्यामा खुम्चिएको छ ।
१२ मेडिकल अफिसर र सोही संख्यामा नर्स कटौती भएपछि ४८ शैय्या संचालन भइरहेको आकस्मिक कक्ष पनि घटेर ३० मा झारिएको छ । सर्जिकल र मेडिकल वार्डमा नर्सको संख्या कम भएसँगै १ सय शैय्या घटेका छन् । नेफ्रोको ओपीडी १२ वटाबाट ८ वटामा झरेको छ ।
दैनिक १५ वटा अपरेसन थ्रिएटरबाट नियमित भइरहेको शल्यक्रिया सेवा घटेर औसतमा ९ वटामा आइपुगेको छ । हप्तामा ६ दिन नै हुने युरोलोजीको शल्यक्रिया ३ दिनमा झरेको छ । अझ दैनिक २३ वटा शल्यक्रिया हुने गरेकोमा त्यो पनि १४/१५ वटा सिमित हुन थालेको छ ।
हप्तामा १ सय ३० वटा शल्यक्रिया हुने गरेकोमा अहिले आएर ४० देखि ४५ वटामा सिमित भएको सो विभागमा काम गर्ने एक चिकित्सक बताउँछन् । त्यसैगरी, ग्यास्ट्रो सर्जरी पनि पहिलेभन्दा आधा कम भएको छ ।
वीर अस्पतालमा आईसीयु शैय्या खुम्चिएसँगै निजी अस्पतालहरु रमाउन थालेका छन् । त्यसो त २ सय २१ कर्मचारी निकालेर चिकित्सा विज्ञान राष्ट्रिय प्रतिष्ठान (न्याम्स)तर्फ ६३ दरबन्दी थप्ने निर्णय गराएका मन्त्री बस्नेतले पछिल्लो समय चिकित्सक, नर्स र स्वास्थ्यकर्मीको दरबन्दी पूर्ति गर्नेभन्दा पनि आफ्ना कार्यकर्तालाई भर्ती गर्न अग्रसर भएका छन् ।
१० कात्तिकमा सार्वजनिक सूचना जारी गरेको भनेर १७ गते गुपचुप ४ जना लिफ्ट असिस्टेन्ट, १ जना प्लम्बर, २ जना इलेक्टीसियनको विज्ञापन निकालेका छन् । त्यसमा १ जना मेडिकल ल्याब टेक्निसियन र ४ जना ल्याव टेक्निसियन पनि मागिएको छ ।
गुपचुप निकालिएको विज्ञापनका लागि मन्त्रालयबाटै पहिल नै नाम पुगिसकेको न्याम्सका एक पदाधिकारी बताउँछन् । ‘मन्त्रीको सचिवालयले दिएको निर्देशनअनुसार नै भएको हो,’ ती पदाधिकारीले भने, ‘अहिले डाक्टर, नर्सलगायत स्वास्थ्यकर्मीको माग छ । तर, मन्त्रीज्यूका कार्यकर्ता एडजस्ट गर्नुपर्ने भएको होला ।’
