काठमाडौं—संसदको शिक्षा, स्वास्थ्य तथा सूचना समितिले चिकित्सकहरुलाई पेशागत क्षेत्रमा नियमित हुने वातावरण सिर्जना गर्न स्वास्थ्य तथा जनसंख्या मन्त्रालयलाई निर्देशन दिएको छ । शुक्रबार समितिका सभापति भानुभक्त जोशीको सभापतित्वमा बसेको बैठकले चिकित्सकमाथि भएका दुर्व्यवहारका घटनाप्रति खेद प्रकट गरेको छ ।
समितिले दोषीउपर नियमानुसार कारवाही गर्न र सार्वजनिक सरोकारको स्वास्थ्य क्षेत्रलाई मर्यादित, सुरक्षित, हिंसा र भयमुक्त एवं मैत्रीपूर्ण बनाएर सेवा प्रवाहको वातावरण गर्न पनि निर्देशन दिएको छ ।
समितिले वार्तामार्फत चिकित्सकहरु एवं स्वास्थ्य क्षेत्रसँग सम्बन्धित समस्याको समाधान वार्तामार्फत गर्न पनि मन्त्रालयलाई निर्देशन दिएको छ । साथै, समितिले स्वास्थ्य क्षेत्रसँग सम्बन्धित समस्या समाधान गर्न उपसमिति तथा अध्ययन कार्यदल गठन गर्ने निर्णयसमेत गरेको छ ।
बैठकमा स्वास्थ्य तथा जनसंख्यामन्त्री मोहनबहादुर बस्नेतले चिकित्सक र स्वास्थ्यकर्मीहरुको सुरक्षामा सरकार गम्भीर रहेको बताए । उनले आन्दोलन फिर्ता लिएमा एक घण्टाभित्र स्वास्थ्य संस्थामा प्रहरी पठाउने व्यवस्था गर्ने बताए । ‘तपाईहरु आन्दोन फिर्ता लिन तयार हुनुस्, एक घन्टाभित्र पुलिस फोर्स पठाउँछौं,’ उनले भने ।
बस्नेतले गृहमन्त्री नारायणकाजी श्रेष्ठसँग चिकित्सकहरु असुरक्षित भएको ठाउँमा प्रहरी राख्नेबारेमा सहमति भएको समेत बताए ।
गृहसचिव दिनेश भट्टराईले सरकार स्वास्थ्यकर्मी तथा स्वास्थ्य संस्था सुरक्षा सम्बन्धी ऐन कार्यन्वयनमा प्रतिवद्ध रहेको बताए । उनले वार्ताद्वारा सम्बाधेन हुन सक्ने, दीर्घकालीन नीतिगत कुराहरुलाई सडकमा ल्याएर सर्वसाधारण प्रभावित हुने गरी सेवा अवरुद्ध नगर्न आग्रह गरे ।
समितिको बैठकमा स्वास्थ्य तथा जनसंख्यामन्त्री बस्नेत, गृह मन्त्रालयका सचिव भट्टराई र स्वास्थ्य सरोकारवाला संघसंसथका प्रतिनिधीहरुको उपस्थिती थियो । स्वास्थ्यसँग सरोकारवाला प्रतिधिनीहरुले कार्यस्थलमा सुरक्षाको प्रत्याभूति दिलाउनुपर्ने माग राखेका थिए ।
