काठमाडौं– स्वास्थ्य बिमा वोर्डले चालु आर्थिक वर्ष २०८०/०८१ मा बिमामा आवद्ध परिवारको संख्या ५० प्रतिशत पुर्याउने लक्ष्य लिएको छ । बिहीबार एक कार्यक्रमको आयोजना गरी सञ्चारकर्मीसमक्ष वोर्डले चालु वर्षमा प्रथामिकतामा रहेका कामहरुको उल्लेख गर्दै सो जानकारी दिएको हो ।
स्वास्थ्य बिमालाई प्रभावकारी बनाउन यसै वर्ष प्रदेश तथा स्थानीय सरकारसँग समन्वय गरी स्थानीय स्वास्थ्य बिमा संयोजन समितिलाई थप प्रभाकारी बनाइने वोर्डले जनाएको छ ।
हाल स्वास्थ्य बिमामा ३१.४ प्रतिशत घरपरिवार आवद्ध रहेको र चालु आर्थिक वर्षमा यसलाई बढाएर ५० प्रतिशत पुर्याउने लक्ष्य रहेको स्वास्थ्य बिमा वोर्डका कार्यकारी निर्देशक डा. दामोदर बसौलाले जानकारी दिए । उनका अनुसार वैदेशिक रोजगारमा जाने व्यक्तिका परिवार र संगठित क्षेत्रलाई पनि यसै वर्ष स्वास्थ्य बिमामा आबद्ध गर्न सम्बन्धित पक्षसँग समन्वय गरिने भएको छ ।
हालको स्वास्थ्य बिमा कार्यक्रमलाई सामाजिक सुरक्षाको सिद्धान्त अनुसार सञ्चालन गर्न ऐन एवं नियमावलीमा उल्लेख भएअनुसार औपचारिक क्षेत्रमा कार्यरत सबै कर्मचारीहरूलाई आवद्ध गर्न अर्थ मन्त्रालय, संघीय मामिला तथा सामान्य प्रशासन मन्त्रालय र स्वास्थ्य तथा जनसंख्या मन्त्रालयमा विशेष पहल गरी कार्यान्वयनमा ल्याइने वोर्डका कार्यकारी निर्देशक बसौलाले बताए ।
बिमा अन्तर्गतका सेवा सुविधालाई परिमार्जन गरी नयाँ सुविधा थैली ल्याउने तयारी गरेकोसमेत उनले जानकारी दिए ।
स्वास्थ्य बिमा ऐन, २०७४, स्वास्थ्य बिमा नियमावली, २०७५ र यससँग सम्बन्धित कार्यविधि, निर्देशिका र मापदण्डहरू आवश्यकताका आधारमा संशोधन गर्ने तयारी पनि वोर्डले गरेको छ ।
प्राथमिक स्वास्थ्य केन्द्र, आधारभूत अस्पताल, प्रादेशिक अस्पताल, संघीय अस्पताल, स्वास्थ्य विज्ञान प्रतिष्ठान, मेडिकल कलेज र निजी अस्पतालहरू गरी हाल देशभरका ४४० वटा सेवा प्रदायक संस्थाहरुबाट स्वास्थ्य बिमा सेवा प्रवाह भैरहेको छ । सरकारले केही समयअघि मात्रै २६ वटा सेवा प्रदायकलाई सूचीबाट हटाएको थियो ।
वि.सं. २०८० असोज ४ सम्मको तथ्यांकमा २२ लाख १६ हजार ६५९ (३३.२५ प्रतिशत) परिवारका ७१ लाख ८१ हजार ३२५ (२४.६२ प्रतिशत) जना नागरिक स्वास्थ्य बिमामा आवद्ध भएका छन् । कुल आवद्ध बिमितमध्ये ५० लाख २६ हजार ९२७ जना नवीकरण (७० प्रतिशत) गरेको पाइन्छ भने कूल ३२ लाख ३१ हजार ५९६ जनाले सेवा सेवा उपभोग (४५.० प्रतिशत) गरेको वोर्डले जनाएको छ ।
