काठमाडौं– देशभरका विभिन्न स्वास्थ्य संस्थाहरुमा डाक्टर तथा स्वास्थ्यकर्मीहरुमाथि भौतिक आक्रमणका घटना बढ्न थालेपछि नेपाल मेडिकल काउन्सिलले गम्भीर ध्यानाकर्षण भएको जनाएको छ । मंगलबार काउन्सिलले एक प्रेस विज्ञप्ती जारी गर्दै बिरामीको स्वास्थ्य उपचार गर्ने शिलशिलामा बिरामीहरुको दुःखद् निधनको विषयलाई लिएर चिकित्सकमाथि भौतिक आक्रमण भएकाप्रति गम्भीर ध्यानाकर्षण भएको जनाएको हो ।
काउन्सिलले चिकित्सकले बिरामीको उपचार गर्ने क्रममा कुनै लापरवाही वा हेलचेक्रयाइ भई कुनै घटना भएको भए त्यस सम्बन्धि गुनासो सुन्ने वा छानविन गर्ने संस्था नेपाल मेडिकल काउन्सिल भएको उल्लेख गरेको छ । ‘बिरामीको उपचारका क्रममा चिकित्सकको लापरवाही वा कुनै घटना भए त्यस सम्बन्धि गुनासो सुन्ने वा छानबिन गर्ने संस्था नेपाल मेडिकल काउन्सिल भएको र त्यस्ता घटनाहरुको छानविन भइरहेको व्यवहोरा अवगत गराउन चाहन्छौं,’ काउन्सिलले भनेको छ ।
उसले उपचारसँग सम्बन्धित कुनै घटना घटेमा सो बारेमा काउन्सिलमा उजुरी नगरी नगरी चिकित्सकमाथि भौतिक आक्रमण गर्ने कार्य कसैलाई पनि हित नगर्ने जनाएको छ ।
‘पीडित पक्षले यस काउन्सिलमा उपस्थित भई वा अन्य माध्यमबाट आफूलाई परेको असरबारे जानकारी गराउन तथा स्वास्थ्य उपचार गराउने स्थललाई शान्ति र भयरहित बनाउन हुन सम्बन्धित सबै पक्षलाई नेपाल मेडिकल काउन्सिल अपील गर्दछ,’ काउन्सिलका रजिष्ट्रार डा. कृष्णप्रसाद अधिकारीले जारी गरेको विज्ञप्तीमा छ ।
