काठमाडौं—सरकारले बहुमुल्य जडिबुटी यार्सा गुम्बा हरेक वर्ष बैशाखदेखि असारसम्म ३० दिनमात्रै संकलन गर्न पाइने गरी निर्देशिका ल्याउने तयारी गरेको छ । वन तथा वातावरण मन्त्रालयले ल्याउन लागेको उक्त निर्देशिकामा यार्सा गुम्बा संकलन अवधि प्रत्येक वर्षको वैशाखदेखि असार महिनाभित्र बढीमा ३० दिनको मात्रै हुने उल्लेख छ ।
यार्सा गुम्बा व्यवस्थापन निर्देशिका, २०८० को मस्यौदा राय सुझावसमेत मन्त्रालयले लिइसकेको छ । निर्देशिकामा यार्सा गुम्बा संकलनका लागि १६ वर्ष पुगेको व्यक्तिलाई मात्रै अनुमति दिने, संकलन इजाजत एक व्यक्तिलाई वर्षको एकपटक मात्र दिइने व्यवस्था छ ।
यस्तै, यार्सा गुम्बा संकलन कार्यलाई व्यवस्थित गर्न स्थान विशेषका आधारमा संरक्षक वा प्रमुख वा परिषद् अध्यक्षले थप निर्देशन दिन वा शर्तहरु तोक्न सक्ने व्यवस्था छ । संरक्षक वा प्रमुख वा परिषद् अध्यक्षका अनुमति लिएर मात्रै यार्सा गुम्बाको ओसार—पसार गर्न पाइने व्यवस्था निर्देशिकामा गरिएको छ ।
सरकारले राष्ट्रिय निकुञ्ज तथा वन्यजन्तु संरक्षण ऐन, २०२९ को दफा ३३ (क) ले दिखएको अधिकार प्रयोग गरेर उक्त निर्देशिका बनाएको हो ।
