काठमाडौं–सस्तो लोकप्रियताको पछाडि दौडिरहेका स्वास्थ्य तथा जनसंख्या मन्त्री मोहनबहादुर बस्नेत आफैले गरेको प्रचार उनका लागि प्रत्युत्पादक हुने देखिएको छ । उनी सस्तो लोकप्रियता कमाउनका लागि क्यामरा अघिपछि लगाएर कहिले आफै अनुगमनमा निस्कन्छन् त कहिले निजी अस्पतालमा १० प्रतिशत शैय्या निःशुल्क भएको प्रचार गर्छन् ।
कतिपय प्रचारहरु त यस्ता छन्, जसमा उनी मन्त्री हुनु अगाडि नै सम्पन्न भएका काम पनि आफूले गरेको भनेर प्रचार गर्न पछि हट्दैनन् । मन्त्रीले निःशुल्क गरेका भनिएका ३ हजार ५ सय २३ बेडको बारेमा आइतबार हेल्थआवाजले फेरिहस्त पेश गरेको थियो । जसमा मन्त्री बस्नेत आएपछि १ हजार ३ सय वेड मात्र निःशुल्क भएको र अन्य २ हजार २ सय २३ बेड पहिलेदेखि नै निःशुल्क रहेका थिए ।
मन्त्री कतिसम्म प्रचारमुखी देखिएका छन् भने उनी स्वास्थ्य मन्त्री नहुँदै भएका कतिपय नीतिगत कामको पनि खुलेर जस लिन अगाडि बढेका छन् । मन्त्रीको कार्यभार सम्हालेको सय दिनको उपलक्ष्ययमा धुमधामका साथ प्रचार गरिएको १ सय ७ काममध्ये चौथो नम्बरमा एउटा दीर्घकालीन नीतिगत काम गरेको भनेर प्रचार गरिएको छ ।
बुँदा नम्बर ४ मा भनिएको छ ‘गत वर्षदेखि स्वीकृतीका लागि पेश भएको स्वास्थ्य तथा जनसंख्या मन्त्रालय एवं समग्र स्वास्थ्य क्षेत्रको उच्च तहको नीतिगत दस्तावेजहरू मध्येको नेपाल स्वास्थ्य क्षेत्र–रणनीतिक योजना (२०७९/८०–२०८७/८८) माननीय मन्त्रीज्यूको विशेष पहलकदमीमा मन्त्रीपरिषद्बाट स्वीकृति भएको ।’
यो रणनीति मन्त्रीपरिषद्बाट स्वीकृत गर्न त के रणनीतिको ‘क’ लेख्नसमेत स्वास्थ्य मन्त्री बस्नेतको कुनै भूमिका छैन । मन्त्री बस्नेत कति हावाका भरमा प्रचारमुखी भएका छन् र उनका नजिकका सल्लाहकार, मन्त्रालयका अधिकारीहरु उनको गुणगान गाउन तल्लीन छन् भनेर यसले पनि देखाउँछ ।
मन्त्री बस्नेतलाई प्रधानमन्त्री पुष्पकमल दाहालले २० बैशाख २०८० मा स्वास्थ्य तथा जनसंख्या मन्त्री नियुक्त गरेका हुन् । उनले २१ बैशाखमा सपथ खाएर स्वास्थ्य मन्त्रालयमा पदभार ग्रहण गरे । तर, प्रधानमन्त्री तथा मन्त्रिपरिषद कार्यलयको वेवसाइडमा नेपाल स्वास्थ्य क्षेत्र रणनीतिक योजना २०८० बैशाख १२ गतेको मन्त्रिपरिषदको बैठकले पास गरेको उल्लेख छ ।
मन्त्री बस्नेतले पदभार ग्रहण गर्नु एक हप्ता अघि नै मन्त्रिपरिषदबाट पास भएको निर्णय मन्त्रीको १०० दिने सफल कार्यकालको प्रमुख काममा प्रचार गर्नुले मन्त्री, मन्त्रीको टिम र स्वास्थ्य तथा जनसंख्या मन्त्रालयका मन्त्रीलाई नीतिगत काममा सहयोग गर्ने सचिवहरु, अतिरिक्त सचिवहरु, सहसचिव, महाशाखा प्रमुखहरुको हैसियत देखिएकोे छ । रोचक त के भने मन्त्री नहुँदैं उनले बाहिरै बसेर कसरी रणनीति योजना पास गराउन महत्वपूर्ण भूमिका खेले अहिलेसम्म स्वास्थ्य मन्त्रालयमा कसैले पनि थाहा पाएका छैनन् ।
यतिमात्र होइन् मन्त्री बस्नेतको उपलब्धिको सूचीमा रहेको स्वास्थ्य वित्त रणनीतिमा पनि आफ्नो विशेष पहल उल्लेख गरेका छन् । तर, उक्त रणनीति ६ महिनाअघि नै तयार भएर क्याबिनेट पुगेको थियो । मन्त्री बस्नेत आउनु अगाडि नै मन्त्रिपरिषद्ले सैद्धान्तिक सहमति दिएर सामाजिक समितिमा छलफलमा थियो । उनी आएको एक हप्तामा नै उक्त रणनीति क्याबिनेटबाट पास भएको थियो । उक्त रणनीति पास गरेको जस लिनु स्वभाविक भएपनि त्यो रणनीतिको सबै काम मैले नै गरेको भन्ने जसरी प्रस्तुत हुनुलाई भने अनौठो मानिएको छ ।
यो पनि पढ्नुस्
