पोखरा—गण्डकी प्रदेशकी सामाजिक विकास तथा स्वास्थ्य मन्त्री सुशीला सिम्खडाले स्वास्थ्य क्षेत्र सुधारका लागि कुनै कसर बाँकी नराख्ने बताएकी छन् । शनिबार मन्त्रालयले आयोजना गरेको प्रदेशस्तरीय स्वास्थ्य कार्यालयहरुको समीक्षा कार्यक्रमलाई सम्बोधन गर्दै उनले प्रदेशबाट नै सकेसम्म धेरै सेवा निःशुल्क दिने योजना अगाडि बढाइने बताइन् ।
मन्त्री सिम्खडाले रिफर गर्नुपर्ने बिरामीको चाप घटाउने गरेर काम गर्नसमेत निर्देशन दिएकी छन् । जिल्ला अस्पतालबाट पोखरा स्वास्थ्य विज्ञान प्रतिष्ठानमा रिफर गर्ने र गण्डकी प्रदेशभन्दा बाहिरका अस्पतलमा रिफर गर्दा बिरामीलाई समस्या हुने भन्दै सकेसम्म धेरै रोगको उपचार जिल्ला अस्पतालहरुमै गर्न निर्देशन दिएकी हुन् ।
उनले आयुर्वेद औषाधालयलाई सँगसँगै विकास गरेर काम गर्ने योजना सुनाइन । गण्डकी प्रदेशका बिरामीलाई जस्तोसुकै रोगलाई पनि गण्डकी प्रदेशभित्र नै उपचार गर्ने वातावरण बनाउने योजना मन्त्री सिम्खडाले सुनाइन् । उनले एनजीओसँग सहकार्य गर्ने कार्यक्रम मन्त्रीलाई सोधेर मात्र अघि बढ्नुपर्नेलगायतका निर्देशन दिइन् ।
गण्डकी प्रदेश नीति तथा योजना आयोगका सदस्य सुवास अधिकारीले गण्डकी प्रदेश सरकारले सुरु गरेको पारिवारिक स्वास्थ्य प्रोफाइल योजना तीव्र रुपमा अघि बढाउनुपर्ने जानकारी दिए । उनले जनताको स्वास्थ्य उपचारको लागि कम खर्च हुने योजना अघि बढाउन अनुरोध गरे ।
संक्रमण तथा सरुवा रोग अस्पतालका निर्देशक डा. विकास गौचनले संक्रमण तथा सरुवा रोग अस्पतालले अहिलेसम्म उल्लेखनीय काम गरेको बताए । अहिले पनि गण्डकी अस्पतालमा अन्य अस्पतालमा नपाइने तर संक्रामण रोग तथा कोभिड १९ विरुद्धको खोप निरन्तर दिएको बताए । ५० शैय्याको अस्पतालमा विभिन्न सरुवा रोग, आँखाको प्रथामिक उपचार र इमर्जेन्सी सेवा २४ घण्टा नै सुचारु गरेको उनले सुनाए ।
गण्डकी प्रदेश जनस्वास्थ्य प्रयोगशाला, गण्डकी प्रदेश स्वास्थ्य निर्देशनालय, प्रदेश क्षयरोग उपचार केन्द्र, सामाजिक विकास तथा स्वास्थ्य मन्त्रालय आपूर्ति व्यवस्थापन केन्द्रलगायतका संस्थाले समीक्षामा प्रगति विवरण र आगामी वर्षको योजना पनि सुनाएका थिए ।
