सरकारी आदेशः पौष्टिक चामल हुन पूरा गर्नुपर्छ यस्ता मापदण्ड

काठमाडौं—सरकारले चामलको गुणस्तर सम्बन्धि व्यवस्था परिवर्तन गरेको छ । अन्नमा आधारित पूरक आहार सम्बन्धि आदेश संशोधन गरी चामलको गुणस्तर निर्धारण सम्बन्धि आदेश, २०८० संशोधन गरेको हो ।

सो आदेशअनुसार पौष्टिक स्तरोन्नती गरिएको चामलमा सुख्खा तौल प्रति केजी आइरन ३९ देखि ७२ मिलिग्राम हुनुपर्ने व्यवस्था गरेको छ । यसैगरी, जिंक ३२ देखि ५९ मिलिग्राम, भिटामिन ए ०.८९ देखि २.२१ मिलिग्राम, फेलिक एसिड ०.२४ देखि ०.५९ मिलिग्राम र भिटामिन बी–१२ ०.००७ देखि ०.०२० मिलिग्राम हुनुपर्ने व्यवस्था गरेको छ ।

चामलाई पौष्टिक बनाउनका लागि आइरन स्रोतका लागि फोरिकपाइरोफोस्पेट, जिंक स्रोतका जिंकअक्साइड, भिटामिन ए स्रोतका लागि रेटिनाइल पाल्मिटेड वा रेटिनाइल एसिटेड, फोलिक एसिड स्रोतका लागि फोलिक एसिड र भिटामीन बी १९ को स्रोतका लागि साइनोकोबलामाइनजस्ता स्वरुपहरु यौगिकका रुपमा थप गर्न सकिने व्यवस्था गरेको छ ।

यसरी चामलको स्तरोन्नती गर्दा सुख्खा तौल प्रतिकिलोको आधारमा थायामिन २.३ देखि ५.६ मिलिग्राम, नियासिन २०.५ देखि ५०.७ मिलिग्रामसम्म र पाइरिडक्सीन १.९ र ४.८ मिलिग्रामसम्म थप्न सकिने आदेशमा उल्लेख छ ।

पौष्टिक तत्व स्तरोन्नती गरिएको चालम स्वादरहित, ढुसी र किरा नलागेको, बाह्य रङ र अन्य कुरा नमिसिएको हुनुपर्ने आदेशमा छ ।
अन्य यौगिकको हकमा भने नेपाल सरकार कृषि तथा पशुपन्छी मन्त्रालयले तोके बमोजिम हुने आदेशमा छ ।

सरकारले १ साउन २०८० बाट खाद्य ऐनअनुसार पौष्टिक तत्व स्तरोन्नती गरिएको चामलमा गुणस्तरको क्षेत्र, आवश्यक गुणस्तर परिधिहरु, कन्टामिनेट्स, टक्सिन्स् तथा अवशेष, स्वच्छता सम्बन्धि व्यवस्था र प्याकेजिङ सम्बन्धि व्यवस्थाको दायरा निर्धारण गर्दै उक्त आदेश राजपत्रमा समेत प्रकाशित गरिसकेको छ ।