काठमाडौं–पहिलो पटक देशभरिका ७४ कारागार कार्यालयमा रहेका कैदी बन्दीहरुको स्वास्थ्य अवस्था र त्यहाँ कार्यरत स्वास्थ्यकर्मीसहितको केन्द्रीय कारागार अस्पतालको वार्षिक प्रगति प्रतिवेदन–२०८० सार्वजनिक भएको छ ।
एक समारोहबीच गृहसचिव दिनेश भट्टराई र स्वास्थ्य सचिव डा. रोशन पोखरेलले संयुक्त रुपमा सो प्रतिवेदन सार्वजनिक गरेका हुन् ।
केन्द्रीय कारागार अस्पतालका प्रमुख मेडिकल सुपरिटेन्डेन्ट डा. प्रकाश बुढाथोकीले अस्पतालको प्रगति प्रतिवेदन प्रस्तुत गरेका थिए । उनले एक वर्षमा ३५ हजार कैदी बन्दीलाई बहिरंग र १ हजार बढीलाई अन्तरंग सेवा प्रदान गरिएको जानकारी दिए ।
कारागार अस्पतालको सेवा विस्तारका लागि भौतिक संरचना कम भएको बताउँदैं थप शैय्या र विशिष्टीकृत सेवा विस्तार जोड दिए । उनले सेवा भौतिक संरचना र सेवा विस्तारको अभावमा ६ हजार धेरै बिरामी कैदी बन्दीलाई अन्य २३ वटा अस्पतालमा रिफर गर्नुपरेको बताए ।
कार्यक्रमका स्वास्थ्य सचिव डा. रोशन पोखरेलले पछिल्लो समय व्यवस्थापकीय सुधार भएको र अन्तर मन्त्रालय समन्वय हुँदै गएको बताए । उनले राज्यले स्वास्थ्यमा प्रशस्तै लगानी गरिएपनि लक्षित वर्गसम्म पुग्न नसकेको भन्दै स्वास्थ्य बिमामा सबै कैदीबन्दीलाई आबद्ध गर्न सके धेरै आर्थिक किफायत हुने बताए ।
गृह सचिव दिनेश भट्टराईले सिमित स्रोत र साधनका बीच पनि अस्पतालले राम्रो सेवा दिएको भन्दै प्रसंसा गरे ।
