काठमाडौं—काभ्रेको धुलिखेलस्थित धुलिखेल अस्पतालका नाममा साढे २४ करोड रुपैयाँभन्दा बढी बेरुजु रहेको पाइएको छ । महालेखा परीक्षकको कार्यलयले प्रत्येक वर्ष निकाल्ने प्रतिवेदनमा अस्पतालको २०७४/०७५ देखि २०७८/७९ सम्म लगेको २४ करोड ५९ लाख ३७ हजार ८४० रुपैयाँको बेरुजु फर्स्योट नगरेको औल्याइएको छ ।
अस्पताल स्थापनादेखि नै स्वास्थ्य तथा जनसंख्या मन्त्रालयमार्फत धुलिखेल सामुदायिक अस्पतालले अनुदान लगिरहेको छ । अस्पतालले आर्थिक वर्ष २०७४/०७५ देखि पछि लगेको अनुदानको हिसाब किताब भने हालसम्म फर्स्योट गरेको पाइदैंन् ।
आर्थिक वर्ष २०७७/०७८ मा प्रकाशित महालेखाको वार्षिक प्रतिवेदनले त अस्पताललाई नै ‘गैरकानुनी’ भनेको छ । सो अस्पतालले ४४० शैय्या संचालन गरेतापनि अनुमति नलिएर संचालन गरेको भन्दैं १ लाख ७० हजार रुपैयाँ जरिवाना र सोमा लाग्ने दस्तुरसमेत असुल उपर गर्नुपर्ने उल्लेख गरेको छ ।
सोही आर्थिक वर्षका लागि छुट्याइएको ५ करोड ६१ लाख ३५ हजार रुपैयाँ अनुदान मन्त्री र सचिवस्तरीय निर्णय गरेर ०७८/०७९ मा खर्च गर्ने गरेको निर्णय गरेकोले त्यो पनि कानुनी प्रक्रिया बाहिर गएकाले सरकारको संचिती कोषमा दाखिला गर्नुपर्ने महालेखाको ठहर छ ।
अस्पताललाई आईसीयु र भेन्टिलेटर खरिदका लागि १ करोड ८० लाख रुपैयाँ भुक्तानी दिन स्रोत सुनिश्चितता गरिएको तर भेन्टिलेटर स्थापना भएको प्रमाण पेश नभएको महालेखाको प्रतिवेदनमा छ ।
आर्थिक वर्ष २०७७/०८८ मा नै २५ एचडियु स्थापना गर्न ३ करोड १२ लाख ७० हजार स्रोत व्यवस्थापन हुँदाहुँदैं पनि एचडियु जडान नगरेका, कोभिड—१९ को उपचार खर्च प्रतिकेश उपलब्ध गराउँदा सरकारले जारी गरेको आदेश बमोजिम तथ्यांक उपलब्ध गराउन नसकेको भन्दैं ३ करोड ९२ लाख १० हजार, ०७७/०७८ मा नै २५ बेडको एचडियु स्थापना गर्दा आयकर बराबरको १८ लाख ६५ हजार ८४० रुपैयाँ दाखिला नगरेको भन्दैं महालेखाले असुल उपर गर्नुपर्ने प्रतिवेदन दिएको छ ।
आर्थिक वर्ष ०७८/०७९ मा निःशुल्क सेवा प्रदान गरेको विवरण पेश नभएको भन्दैं ९८ लाख ३९ हजार रुपैयाँ बेरुजु देखाएको छ । यसैगरी, आर्थिक वर्ष ०७४/०७५ मा ३४ लाख ४८ हजार रुपैयाँ, ०७५/०७६ मा ८ करोड ५० लाख रुपैयाँ, ०७६/०७७ मा १ करोड रुपैयाँ अस्पतालका नाममा बेरुजु देखिएको छ ।
महालेखाले धुलिखेल अस्पतालका नाममा आर्थिक वर्ष ०७४/०७५ देखि बेरुजु देखाएपछि गत स्वास्थ्य मन्त्रालयले अनुदान स्वरुप अस्पताललाई ८ करोड रुपैयाँ बजेट सुनिश्चिता गरेतापनि रोकिएको छ ।
चालु आर्थिक वर्षका लागि मन्त्रालयले धुलिखेल अस्पतालको स्वामित्वमा बन्न लागेको ‘धुलिखेल हस्पिटल ट्रमा एण्ड इमर्जेन्सी सेन्टर’ लाई २ करोड रुपैयाँ अनुदान छुट्याएको छ । सोमबार धुलिखेल पुगेका स्वास्थ्यमन्त्री बस्नेतले करोडौं बेरुजु रहेको धुलिखेल अस्पताललाई निकट भविष्यमा ट्रमा सेन्टर बनाउन स्वास्थ्य मन्त्रालयले सक्दो सहयोग गर्ने बचन समेत दिएका छन् ।
