चरिकोट—दोलखाको विगु गाउँपालिकाले दीर्घ रोगका बिरामीको औषधी उपचार गर्दै आएको छ । गाउँपालिकाले आफ्ना नागरिकहरुको स्वास्थ्य अवस्थालाई ध्यानमा राखी दीर्घ रोगका बिरामीहरुका लागि निःशुल्क औषधी उपचार गर्दै आएको हो ।
आर्थिक वर्ष वि.सं. २०७९/८० मा पालिकाले दीर्घ रोगका बिरामीहरुका लागि १०७ जनालाई तीन लाख ५२ हजार औषधी उपचार खर्च भएको विगु स्वास्थ्य शाखाका प्रमुख रत्नबहादुर थामीले जानकारी दिए । उनका अनुसार एक आर्थिक वर्षमा दीर्घ रोगका बिरामीले औषधी उपचार इमर्जेन्सी ६ जनाको उपचारको लागि चौरासी हजार दुई सय १२ रुपैयाँ खर्च भएको जनाकारी दिए । दीर्घ रोगअन्तर्गत यस पालिकामा दम, मुटु रोग, मिर्गौला, चिनी रोग, उच्च रक्तचाप र सिओपीडीका रोगका बिरामी छन् ।
गाउँपालिकाले नागरिकको स्वास्थ्यलाई उच्च प्राथमिकता दिदैं गर्भवती तथा सुत्केरी महिला, विपन्न नागरिक र दीर्घ रोगका बिरामीहरुको स्वास्थ्य उपचारको लागि विभिन्न सेवा प्रदान गर्दै आएको छ । गत आर्थिक वर्षमा मात्र गर्भवती तथा सुत्केरी २२ जना महिलाहरुलाई निशुल्क एम्बुलेन्स सेवा प्रदान गरिएको थियो ।
त्यस्तै, मिर्गौला, क्यान्सर, मेरुदण्डका समस्याका बिरामीलाई पालिकाले २२ जनालाई पाँच हजारको दरले आठ लाख पैसठ्ठी हजार दिएको पालिका अध्यक्ष सन्जीव ओलीले बताए । आगामी आर्थिक वर्षमा साउन महिनाभित्रमा दीर्घ रोगका बिरामीको डाटा संकलन गरी यस कार्यक्रमलाई निरन्तरता दिने अध्यक्ष ओलीले बताए । दीर्घ रोगका बिरामी र हिडडुल गर्न नसक्ने बिरामीहरुको घरमै पुगेर निःशुल्क उपचार गरिदिने वार्षिक कार्यक्रमनै तय गरिएको पालिकाले जानकारी दिएएको छ ।
दीर्घ रोगका बिरामीको स्वास्थ्य उपचारको साथै विपन्न वर्गको स्वास्थ्य अवस्था चेक जाँच गरी सिफारिस दिदैं आएका छन् । गत आर्थिक वर्षमा स्वास्थ्य शाखाले बुझाएको रिपोर्टको आधारमा पालिकाले २४ जनालाई विपन्न नागरिक सिफारिस गरिएका थिए ।
