नेपालगन्ज—नेपालगञ्ज उपमहानगरपालिकाले सहरी क्षेत्रका जनतालाई आधारभूत स्वास्थ्य सेवा प्रदान गर्न सहरी स्वास्थ्य प्रवर्द्धन केन्द्र संचालनमा ल्याएको छ ।
केन्द्रमा एमबीबीएस तहका चिकित्सक, हेल्थ असिस्टेन्ट, स्टाफ नर्स, ल्याब असिस्टेन्ट र प्रयोगशालासहित १० जना स्वास्थ्यकर्मी रहनेछन् । नेपालगन्ज—४ गणेशपुरमा संचालनमा ल्याइएको स्वास्थ्य प्रवर्द्धन केन्द्रबाट नगरवासीहरुलाई आधारभूत तहको स्वास्थ्य चेकजाँच निःशुल्क र प्रयोगशालामा करिब दुई दर्जन किसिमका जाँचहरु गर्ने सुविधा उपलब्ध गराइएको उपमहानगरपालिकाका स्वास्थ्य महाशाखाका प्रमुख रामबहादुर चन्दले बताए ।
उपमहानगरपालिकाका मेयर प्रशान्त विष्टले स्वास्थ्य सम्बन्धी समस्या भएकाहरुलाई नेपालगन्ज उपमहानगरपालिकाको तर्फबाट निःशुल्क चेक जाँच र प्रयोगशालाबाट गर्नुपर्ने जाँचहरु सहुलियत दरमा गर्ने ब्यवस्था मिलाइएको बताए ।
उपमहानगरपालिकाले केन्द्रमा आयुर्वेदिक उपचारको सुविधासमेत थप गरी नगरवासीलाई रोग लाग्नै नदिनका लागि खानपिनमा र नियमित रुपमा योगलगायतका अभ्यास गर्नका लागि प्रेरित गर्नका लागि नियमित रुपमा कार्यक्रमहरु संचालन गर्ने तयारी गरिरहेको छ ।
सहरी स्वास्थ्य प्रवर्द्धन केन्द्रको प्रयोगशालाबाट सरकारी अस्पतालभन्दा २० प्रतिशत सस्तोमा शुल्कमा विहान ७ बजेदेखि ९ तथा विहान १० देखि दिउँसो १ बजेसम्म विभिन्न जाँचहरु गरिने ब्यवस्था मिलाइएको छ ।
प्रवर्द्धन केन्द्रको बाँकेका प्रतिनिधिसभाका सांसद एवं नेपाली कांग्रेसका सहमहामन्त्री किशोरसिंह राठौर र नेपालगञ्ज उपमहानगरपालिकाका नगर प्रमुख प्रशान्त विष्टले संयुक्त रूपमा उद्घाटन गरेका थिए ।
