काठमाडौं—स्वास्थ्य तथा जनसंख्या मन्त्रालयले आत्महत्या सम्बन्धी मन्त्रीको विवादास्पद अभिव्यक्ति स्वास्थ्यकर्मीहरुको मनोबल उच्च राख्ने सन्दर्भमा आएको जनाएको छ । बिहीबार मन्त्रालयले एक विज्ञप्ती जारी गर्दै मन्त्रीको उक्त विवादास्पद अभिव्यक्तिको बचाउ गरेको छ ।
विज्ञप्तीमा मन्त्रालयले मन्त्रीको अभिव्यक्तिलाई तोडमरोड गरिएको आरोप लगाउँदैं त्यसप्रति आफ्नो गम्भीर ध्यानाकर्षण भएको उल्लेख गरेको छ । मन्त्रालयले आत्महत्याजस्ता संवेदनशील विषयमा समाचार सम्प्रेषण नगर्न अनुरोध गरेको छ । तर, स्वास्थ्यमन्त्री आफैले पटक—पटक सार्वजनिक रुपमा आत्महत्याको एउटै प्रसंगलाई दोहो¥याइरहेका छन् ।
‘दरबन्दी भएको स्थानमा कर्मचारी नजाने, दुर्गमका बिरामी गरिब, विपन्न र निमुखा जनताले विशेषज्ञ सेवा नपाउने तर सुगममा दरबन्दीभन्दा बढी स्वास्थ्यकर्मी चिकित्सक थुप्रिने कामकाज र उनीहरुको सट्टामा करारमा लिएका जनशक्तिले गर्दा राज्यलाई वर्षेनी थप ९५ करोडभन्दा बढी आर्थिक भार परेको छ,’ विज्ञप्तीमा छ ।
अर्थले समेत दरबन्दीभन्दा बढी भएका कर्मचारी तलब भुक्तानी नगर्ने भनेको उल्लेख गर्दै मन्त्रालयले विकृती समाधान गर्न असफल मनसायका साथ गरेका प्रयासमा यस्ता भ्रामक र धम्कीपूर्ण भाषाको प्रयोग, खटाइएको ठाउँमा नजानेजस्ता गतिविधीले गर्दा अनवरत रुपमा खटिएका स्वास्थ्यकर्मीको भावनामाथि गम्भीर आघात पुगेको उल्लेख छ ।
मन्त्री बस्नेतले खटाएको ठाउँमा नगएर आत्महत्या गर्छु भनेर भन्नेलाई आफै डोरी दिने र आफ्नो गेटमा आएर आत्महत्या गर्न सचिवलाई भनेको प्रसंग सार्वजनिक कार्यक्रममै उठाएका थिए । जसको चौतर्फी विरोध भएपछि मन्त्रालयले बिहीबार मन्त्रीको बचाव गर्न विज्ञप्ती नै जारी गरेको हो ।
