कार्यकारी निर्देशकलाई मन्त्रालय तानेर निमित्तलाई भक्तपुर क्यान्सर अस्पतालको जिम्मा

काठमाडौं—स्वास्थ्य तथा जनसंख्यामन्त्री मोहनबहादुर बस्नेतले भक्तपुर क्यान्सर अस्पतालको कार्यकारी निर्देशक फेर्ने विवादास्पद निर्णय गरेका छन् । सोमबार मन्त्रीस्तरीय निर्णय गर्दै मन्त्री बस्नेतले भक्तपुर क्यान्सरका कार्यकारी निर्देशकलाई मन्त्रालय तानेर निमित्त कार्यकारी निर्देशकलाई अस्पताल प्रमुख बनाएका छन् ।

प्रा.डा. विष्णुदत्त पौडेल भक्तपुर अस्पतालको कार्यकारी निर्देशक थिए । उनको कार्यकाल झण्डै डेढ वर्ष बाँकी छदैं मन्त्री बस्नेतले निमित्त कार्यकारी निर्देशकका रुपमा डा. उज्जवल चालिसेलाई नियुक्त गरेका हुन् ।

डा. पौडेल वि.सं. २०७७ मंसिरमा भक्तपुर अस्पतालको कार्यकारी निर्देशक नियुक्त भएका थिए ।

वि.सं. २०७७ मै सरकारले भक्तपुर क्यान्सर अस्पताल नेपाल सरकारको संघीय अस्पतालका रुपमा संचालन गर्ने निर्णय गरेर आफू मातहत ल्याएको थियो । त्यसअघि भक्तपुर क्यान्सर अस्पताल गैरसकारी संस्था नेपाल अर्वुद रोग निवारण संस्थाले संचालन गर्दै आएको थियो ।

उक्त संस्थाको व्यवस्थापन र वैधानिकतामाथि प्रश्न उठेपछि सरकारले भक्तपुर अस्पताल विकास समिति गठन आदेश, २०७७ स्वीकृत गरेर आफू मातहत ल्याएको थियो ।