काठमाडौं—जनशक्तिको अभावमा क्षमता विस्तार गर्न नसकेको वीर अस्पतालमा एकै पटक २४५ जना नर्स पदस्थापन गरेको छ । सोमबार स्वास्थ्य तथा जनसंख्या मन्त्रालयले वीरका लागि लोकसेवाले लिएको विशेष परीक्षामा उत्तीर्ण भएका २ सय ९४ जनानर्समध्ये २४५ जनालाई वीरमा पदस्थापन गरेको हो ।
अन्य ५० जना नर्सको भने अन्य संघीय अस्पतालमा पदस्थापन भएको छ । मन्त्रालयका कर्मचारी प्रशासन महाशाखाका प्रमुख तुलसीनाथ गौतमले लोकसेवाबाट आएका २ सय ९४ जना नर्सको पदस्थापन सोमबार नै सकिएको बताए । ‘सबै नर्सहरुको पद सकिएको छ’ उनले भने।
उनकाअनुसार नयाँ लिइएका २ सय ४५ जना नर्सहरु वीरमा र अन्य ५० जना अन्य संघीय अस्पतालमा पदस्थापन भएको छ ।
सरकारले दुई वर्षअघि नै वीर अस्पताल ५०० सय शैय्याबाट ९०० शैय्याको अस्पतालमा बनाउने निर्णय गरिसकेको छ । सोहीअनुसार वीर नयाँ संगठन संरचनासमेत पास भएर लोकसेवाले त्यहीअनुसार नर्सिङ स्टाफका लागि पहिलो पटक दरबन्दी खोलेको हो ।
नर्सिङ जनशक्ति कम हुँदा वीर अस्पतालको नयाँ सर्जिकल भवनमा रहेका १६ वटा शल्यक्रिया कक्षमध्ये ९ वटा मात्रै संचालनमा छन् । जनशक्ति थपिएसँगै वीरको क्षमता वृद्धि हुनेछ ।
९०० शैय्याका लागि आवश्यक चिकित्सक, पारामेडिक्सलगायतका अन्य जनशक्ति भने पदपूर्ति गरिएको छैन ।
