काठमाडौं—चिकित्सा शिक्षा आयोगले लिएको ब्याचलर अफ डेन्टल सर्जरी (बिडिएस)को एकीकृत प्रवेश परीक्षामा २४६३ विद्यार्थीले नाम निकाले । जसमा पहिलो नम्बरमा छन्—जुम्लाका २० वर्षीय सुवास आचार्य । बिडिएसमा मात्रै होइन्—६६६९ विद्यार्थी उत्तीर्ण भएको एमबीबीएसको इन्ट्रान्समा पनि उनले नवौं नम्बरमा नाम निकालेका छन् । २०० पूर्णांकको बिडिएसको प्रवेश परीक्षामा १७२ अंकसहित पहिलो नम्बरमा नाम निकालेका उनले त्यति नै पूर्णांकको एमबीबीएसको प्रवेश परीक्षामा १६९.२५ अंकका साथ नवौं नम्बरमा नाम निकालेका छन् ।
बिडिएस इन्ट्रान्स टपर र एमबीबीएस इन्ट्रान्सको टपटेनमा परेका सुवासको रोजाइमा भने एमबीबीएस परेको छ । सुवास अब डाक्टरी सपना पूरा गर्न महाराजगन्ज मेडिकल क्याम्पसमा पढ्ने बताउँछन् । ‘सबै मेडिकल स्टुडेन्टहरुको ड्रिम कलेज भनेको महाराजगन्ज मेडिकल क्याम्पस हो,’ उनी भन्छन्, ‘भाग्य र मेहनतले त्यही कलेजमा पढ्ने अवसर पाएको छु, महाराजगन्ज मेडिकल क्याम्पसमै पढ्छु ।’ उनले भविष्यमा आफू कार्डियोलोजिष्ट बन्ने सपना रहेको उल्लेख गरे ।
कर्णाली प्रदेशको जुम्लाको विकट हिमा गाउँपालिका—१ मा वि.सं. २०५९ सालमा उनको जन्म भएको हो । शिवराम आचार्य र देवकी आचार्य चार सन्तानमध्ये उनी तेस्रो हुन् । उनका बुवा बाँके जिल्ला अदालतका सरकारी जागिरे हुन् भने आमा गृहणी ।
सामान्य परिवारमा जन्मिएका सुवास ४ वर्षसम्म जुम्लामै बसे । त्यसपछि उनी परिवारसँगै नेपालगन्ज झरे । नेपालगन्जको मुनतारा इंग्लिस मिडियन हाइस्कुलबाट उनको प्रारम्भिक शिक्षादीक्षा अगाडि बढेको हो । त्यहाँबाट उनले कक्षा ४ सम्मको पढाइ पूरा गरे । त्यसपछि उनी नेपालगन्जकै आदर्श सेकेण्डरी स्कुलमा अध्ययन गर्न थाले ।
स्कुल जीवनदेखि नै पढाइमा पनि अब्बल सुवास सुरुवाती दिनमा साहित्य मन पराउथे । पछि विज्ञान र गणित उनका मनपर्ने विषय भए । ‘रट्नुपर्ने विषयभन्दा मलाई बुझ्ने खालका विषय मन पर्न थाले,’ उनी कारण खोल्दै भन्छन् । पढाइसँगसँगै खेलकूदमा पनि रुचि राख्ने उनी क्रिकेट खेलाडी पनि हुन् । सुवासले वि.सं. २०७५ सालमा आदर्श सेकेण्डरी स्कुल नेपालगन्जबाट ३.७ जिपीए (ए प्लस) ल्याएर एसएलसी उत्तीर्ण गरेका हुन् ।
त्यसपछि उनले छोरालाई डाक्टर बनाउने बुवाको सपना र आफ्नै पनि सपना पूरा गर्नका लागि साइन्स पढ्ने मनस्थिती बनाए । त्यसका लागि आफूले एसएलसी पढेको आदर्श सेकेण्डरी स्कुलमै साइन्स लिएर प्लस टु अध्ययन सुरु गरे । वि.सं. २०७७ सालमा उनले आफ्नो प्लस टु अध्ययन सके ।
‘वुवाले जुम्लाबाट एसएलसी दिनुभएको हो, एमबीबीएस पढ्ने भनेर भारत जानुभयो । त्यो बेला विविध कारणले पढ्न सक्नुभएन्,’ उनले आफ्नो एमबीबीएस एम्वीसनबारे सुनाए, ‘बुवाको सपना थियो आफू पढ्न नसकेपनि छोरालाई डाक्टरी पढाउँछु । ‘मैले गर्न सकिनँ तिमीहरुले डाक्टर बन्नुपर्छ’ भन्नुहुन्थ्यो । बुवाको त्यही बचनले एमबीबीएस पढ्ने प्रेरणा मिलेको हो ।’ अर्कोतर्फका उनका फुपुका छोरा (दाइ)ले पनि उनी १० कक्षामा पढ्दैं छात्रवृत्तिमा बिडिएसमा नाम निकालेर धरानमा अध्ययन सुरु गरे । ‘दाइले पनि एकदमै गाइड गर्नुहुन्थ्यो,’ उनले थपे, ‘बुवा र दाइले गर्दा नै एमबीबीएस पढ्ने प्रेरणा मिलेको हो ।’
स्कुल जीवनदेखि नै एमबीबीएसलाई आफ्नो लक्ष्य बनाएका उनी प्लस टु सकेपछि काठमाडौं आए । ‘नेपालगन्जमा काठमाडौंजस्तो न प्रि—मेडिकल क्लास हुन्छ न कुनै अन्य तयारी नै,’ सुवास भन्छन्, ‘तयारी मैले काठमाडौं गएपछि मात्रै सुरु गरेको हुँ ।’ उनले प्लस टु पढ्दैं दाइ सल्लाहअनुसार केही किताबहरु भने किनेर पढिरहेका हुन्थे । काठमाडौं आएर एमबीबीएसको तयारी अगाडि बढाए । पहिलो वर्ष उनले बिडिएसमा छात्रवृत्तिमा नाम निकाले । तर, एमबीबीएसमा छात्रवृत्तिमा नाम ननिस्किएपछि उनले त्यसलाई छोडिदिए । नयाँ शैक्षिक सत्रका लागि तयारी अगाडि बढाए ।
भनिन्छ, प्रयास गर्नेहरुले नै सफलता पाउँछन् । सुवासको जीवनमा पनि त्यही भो । यस पटक सुवासले एमबीबीएसको इन्ट्रान्समा ९ औं नम्बरमा नाम निकाले भने बिडिएसको इन्ट्रान्समा पहिलो नम्बरमा नाम निकालेर टप नै गरे । टप गर्ने फर्मुला के हुँदोरहेछ ? भन्छन्, ‘पढाइको कुनै फर्मुला हुँदैन्, पढाइ मात्रै हो ।’ उनी एमबीबीएस तयारी गर्दा ७० प्रतिशत कष्ठ गर्ने र ३० प्रतिशत बुझेर पढ्ने तरिका अपनाउनुपर्नेमा जोड दिन्छन् ।
एमबीबीएस तयारी गरिरहेका हजारौं विद्यार्थीलाई उनको सुझाव के छ त ? भन्छन्, ‘११ र १२ कक्षा पढ्ने भाइबहिनीहरुलाई अहिलेबाट नै राम्रो तयारी गर्न सल्लाह दिन्छु । मेरोजस्तो गर्नुभएन्, मैले ११ र १२ कक्षा पढ्दा राम्रो तयारी गर्न पाइन्, नेपालगन्जमा पढ्का लागि राम्रो इन्स्टिच्युट पनि छैन । त्यही कारण पहिलो प्रयासमा एमबीबीएसमा छात्रवृत्तिमा नाम निकाल्नबाट चुके । त्यही कारण भाइबहिनीहरुलाई ११, १२ कक्षादेखि नै तयारी गर्नुहोस् भन्न चाहन्छु ।’ एमबीबीएस तयारीमा रहँदाको अनुभव सुनाउँदैं उनी भन्छन्, ‘यो समयमा डर र एन्जाइटीले सताउँछ । तर, डराउनु भएन, सेल्फ कन्फिडेन्ट हुनुप¥यो । निरन्तर पढ्न र मेहनत गर्न छाड्नुभएन ।’
