काठमाडौँ – नेपालमा वर्षेनी ३२ हजारभन्दा बढी क्षयरोगका बिरामीहरू उपचारको दायरामा आउन नसकिरहेको पाइएको छ । मार्च २४ को विश्व क्षयरोग दिवसको अवसर पार्दै राष्ट्रिय क्षयरोग निवारण केन्द्रद्वारा जारी गरिएको एक प्रेस विज्ञप्तिमा उक्त कुरा उल्लेख गरिएको हो ।
विज्ञप्तिमा, नेपालमा नयाँ र पुराना गरी १ लाख १७ हजार क्षयरोगका बिरामीहरू हुने गरेको जनाउँदै आर्थिक वर्ष ७८/७९ मा ३७ हजार ८६१ जना नयाँ बिरामी दर्ता गरिएको जनाइएको छ । त्यसमा ६१.६ प्रतिशत पुरुष, ३८.४ प्रतिशत महिला र ८.७ प्रतिशत बालबालिकामा यो रोग लागेको जनाइएको छ । ९१.५ प्रतिशत क्षयरोगका बिरामीहरूको भने सफलता पूर्वक उपचार भइसकेको छ ।
त्यस्तै, आइपरेको चुनौतीहरूको सामना गर्न तयार पारिएको २०७८/७९ – २०८२/८३ को लागि पञ्चवर्षीय रणनीतिक योजना कार्यान्वयनमै रहेको जनाइएको छ । रणनीतिलाई कार्यान्वयन गर्नका लागि १० वटा कार्यनीतिहरू तय गरिएको बताइएको हो ।
२ हप्ता वा सोभन्दा बढी समयसम्म खोकी लागिरहनु, साँझपख ज्वरो आउनु, तौल घट्नु, खकारमा कहिलेकहीँ रगत देखा पर्नु र खाना खान मन नलाग्नुजस्ता क्षयरोगको लक्षणलाई पहिचान गर्न सके चाँडै उपचार गरी निको हुन सकिने जनाइएको छ ।
विश्व स्वास्थ्य संगठनको मूल नारा ‘हो, हामी क्षयरोगको अन्त्य गर्छौँ’लाई आत्मसात् गर्दै मनाउन लागिएको हो ।
