काठमाडौं—सरकारले प्रस्तावित गेटा मेडिकल कलेजलाई शहीद दशरथ चन्द राष्ट्रिय स्वास्थ्य विज्ञान विश्वविद्यालय बनाउने तयारी गरेको छ । आइतबार सुदूरपश्चिमका अगुवा नेता, विज्ञहरुको टोलीसँगको छलफलमा प्रधानमन्त्री पुष्पकमल दाहालले आगामी क्याबिनेट बैठकबाटै आफूले शहीद दशरथ चन्द राष्ट्रिय स्वास्थ्य विज्ञान विश्वविद्यालय बनाउने निर्णय गराउने बताएका छन् ।
नेकपा एमालेका सचिव एवं प्रदेश इन्चार्ज लेखराज भट्टले सुदूरपश्चिम प्रदेशको उच्च राजनीति नेतृत्व र विज्ञहरुको टोली गेटालाई शहीद दशरथ चन्द राष्ट्रिय स्वास्थ्य विज्ञान विश्वविद्यालय बनाउने प्रस्ताव लिएर प्रधानमन्त्री कहाँ गएको बताए ।
‘हामीले गेटालाई शहीद दशरथ चन्द राष्ट्रिय स्वास्थ्य विज्ञान विश्वविद्यालय बनाउने पहल गरिदिन प्रधानमन्त्रीलाई आग्रह ग¥यौं,’ भट्टले भने, ‘उहाँले आगामी क्याबिनेट बैठकबाट आफूले शहीद दशरथ चन्द राष्ट्रिय स्वासथ्य विज्ञान विश्वविद्यालय बनाउने निर्णय गर्ने बताउनुभयो । हामीले धन्यवाद दियौं ।’
‘यो सुदूरपश्चिम र नेपालकै लागि गर्व र खुसीको कुरा हो । नेपालमा आजसम्म पनि स्वास्थ्य विज्ञान विश्वविद्यालय नभएको अवस्थामा यो विश्वविद्यालयले दक्ष चिकित्सक, विशेषज्ञ चिकित्सा सेवा, विशिष्टीकृत चिकित्सकीय र जनस्वास्थ्यसँग सम्बन्धित अनुसन्धानको कमी पूरा गर्ने विश्वास लिएका छौं,’ सुदूरपश्चिमका पूर्व तथा वहालवाला जनप्रतिनिधी, विषय विशेषज्ञ, नेपाल सरकारका मुख्य सचिव र शिक्षा तथा स्वास्थ्य सचिवहरुसँग छलफलमा दाहालले भनेका थिए ।
नेता भट्टकाअनुसार प्रधानमन्त्री दाहालको भोलि हुने सुदूरपश्चिम भ्रमणका क्रममा सम्भतः उनले गेटालाई स्वास्थ्य विज्ञान विश्वविद्यालय बनाउने घोषणा गर्नेछन् ।
कैलालीको गेटास्थित प्रस्तावित गेटा मेडिकल कलेज भौतिक पूर्वाधार बनेको लामो समय बितिसक्दा पनि कानुन अभावका कारण संचालनमा आउन सकेको छैन ।
सुदूरपश्चिमका स्थानीयहरुले गेटालाई विश्वविद्यालयका रुपमा विकास गर्न माग गर्दै आएका छन् ।
