चीनको तेस्रो सबैभन्दा बढी जनसङ्ख्या भएको हेनान प्रान्तका ९० प्रतिशतलाई कोभिड १९ सङ्क्रमण भइसकेको स्वास्थ्य अधिकारीले जनाएका छन् ।
प्रान्तका अधिकारी कान क्वान्चेङले एक प्रेस कन्फ्रेन्स आयोजना गर्दै झन्डै ८८.५ मिलियन मानिसलाई कोभिड १९ सङ्क्रमण भएको जनाएका हुन् ।
चीन हाल शून्य कोभिड को नीतिलाई खुकुलो बनाएपछिको बढिरहेको कोभिड १९ को लहरसँग लडिरहेको छ । चौतर्फी विरोधपछि चीनले उक्त नीति हटाएको थियो ।
प्रान्तका अधिकारी कानले कुन समयमा ती सङ्क्रमणहरू भएका हुन भन्ने बारे नबताए पनि चीनले खुकुलो पारेको नीतिका कारण बढिरहेको सङ्क्रमणलाई हेर्दा पछिल्ला केही हप्ताको तथ्याङ्क रहेको हुनसक्ने बिबिसीले जनाएको छ ।
डिसेम्बरको १९ तारिखमा सङ्क्रमण चुलिएको भए पनि त्यसपश्चात् सङ्क्रमण घट्दै गएको उनले जानकारी दिएको बिबिसीले जनाएको छ ।
नीतिलाई खुकुलो बनाएपछि १ अर्ब ४० करोडको जनसङ्ख्या भएको देश चीनको एक प्रान्तकै १ लाख २० हजार मानिस मात्रै सङ्क्रमित भएको प्रान्तको तथ्याङ्कमा देखाइएको छ भने ३० जनाको मृत्यु भएको जनाइएको छ ।
हाल चीनमा ठुलो सङ्ख्यामा कोभिड १९ को जाँच गराउनुपर्ने तथा आइसोलेसनमा बस्नुपर्ने कुरा लागु गरिएको छैन ।
बिबिसीबाट भावानुवाद
