नेपालगन्ज—बाँकेको खजुरास्थित सुशील कोइराला प्रखर क्यान्सर अस्पतालले रेडियसन थेरापी अर्थात सेकाइ प्रविधीबाट उपचार गर्नुपर्ने क्यान्सरका बिरामीका लागि लिन्याक मेसिन ल्याएको छ । लामो समयको प्रयासपछि क्यान्सर अस्पताल खजुरामा करिब २५ करोड मुल्य पर्ने लिन्याक मेसिन ल्याउन सकिएको अस्पतालका कार्यकारी निर्देशक डा. निरज भट्टराईले बताए ।
पाठेघरको मुख, स्तन, नाक, कान घाटीलगायत शरीरका विभिन्न अंगहरुमा हुने क्यान्सरको उपचारका लागि बाहिरी सेकाइ गर्न लिन्याक मेसिन आबश्यक पर्छ ।
क्यान्सर अस्पताल खजुरामा रिन्याक मेसिन नहुँदा बाहिरी सेकाइ प्रबिधीबाट उपचार गर्नुपर्ने ३० जनासम्म बिरामीहरु भरतपुर र भक्तपुर क्यान्सर अस्पताल धाउन बाध्य थिए । बिरामीको अत्याधिक चाप हुँदा भरतपुर र भक्तपुर क्यान्सर अस्पताल बाहिरी सेकाइका लागि बिरामीहरुले एक महिनादेखि ४५ दिनसम्म पालो पर्खनुपर्ने बाध्यता थियो ।
नेपाल सरकारको बजेटबाटै लिन्याक मेसिन क्यान्सर अस्पताल खजुरामा ल्याइएको हो । लिन्याक मेसिन संचालन भएपछि क्यान्सर अस्पताल खजुरामै क्यान्सरको उपचारमा नयाँ फड्को मार्ने क्यान्सर अस्पताल खजुराका रेडियसन अंकोलोजिष्ट डा. मुकेश यादवले बताए ।
लिन्याक मेसिनलाई जडान गर्नका लागि बंकर निर्माण भइसकेको छ । प्राविधिकहरुले बंकरमा मेसिन जडानका लागि आवश्यक तयारीहरु सुरु गरेका छन् । लिन्याक मेसिनलाई जडान भई उपचार सेवा सुरु हुन करिब ३ महिना लाग्ने क्यान्सर अस्पताल खजुराका कार्यकारी निर्देशक भट्टराईले बताए । लिन्याक मेसिनलाई जडान हुन लागेको क्यान्सर अस्पताल खजुरा लुम्बिनी, कर्णाली र सुदूरपश्चिम प्रदेशकै पहिलो सरकारी क्यान्सर अस्पताल हो ।
क्यान्सर अस्पतालमा लिन्याक मेसिन आउँदा निक्कै उत्साहित भएको आमाको क्यान्सर उपचार गराई रहेकी पुष्षा भाटले बताइन् । क्यान्सर अस्पतालले पछिल्ला ३ वर्षमा, सर्जरी, हिष्टोप्याथोलोजी ब्राकीथेरापी र कल्पोस्कोपी सेवा विस्तार गर्दै आएको छ ।
अस्पतालमा २० जना विशेषज्ञ चिकित्सकसहित करिब १ सय २५ जनाको टिमले बिरामीलाई शल्यक्रियासहितको उपचार सेवा प्रदान गर्दै आएको छ ।
