नेपालगन्ज—महामारीको रुपमा फैलिएको दादुराको प्रकोप नियन्त्रणका लागि नेपालगन्जमा दादुराको खोपसँगै ‘भिटामिन ए’ खुवाउन सुरु गरिएको छ । दादुराको संक्रमणबाट एकजना बालकको मृत्यु हुनुका साथै ३० जना बालबालिका बिरामी परेपछि दादुराको प्रकोप नियन्त्ररणका लागि संक्रमित बिरामीको खोज तलास र उपचारसँगै ६ महिनादेखि १५ वर्ष उमेरका बालबालिकालाई दादुरा विरुद्धको खोप र भिटामिन एकको क्याप्सुल खुवाउन सुरु गरिएको हो ।
नेपालगन्जमा ५ देखि १२ वर्ष उमेरका ३० जना बालबालिकामा दादुराको संक्रमण देखिएको छ । संक्रमण देखिएका अधिकांश बालबालिका मुस्लिम र मधेशी समुदायका छन् । दादुराको संक्रमण फैलदै गएपछि अभिभावकहरुले नजिकैको खोप केन्द्रमा लगेर आफ्ना बालबालिकाहरुलाई दादुरा विरुद्धको खोप र भिटामिन ए को क्याप्सुल खुवाउन थालेका छन् ।
स्वास्थ्य कार्यालय, बाँकेको सहयोगमा नेपालगञ्ज उपमहानगरपालिकाले दादुरा फैलिएको नेपालगन्ज उप—महानगरपालिकाको ५, ७ र ८ नम्बर वडामा आजदेखि दादुराविरुद्धको खोप र भिटामिन एको क्याप्सुल खुवाउन अभियान सुरु गरेको हो ।
दादुरा सरुवा रोग भएका कारण संक्रमण देखिएका बिरामी खोक्दा, खानेकुराहरु बाडेर खादा, एउटै कपडा पालैपालो गरेर प्रयोग गर्दा अन्य व्यक्तिमा सर्छ । दादुरा संक्रमण भएका बालबालिकाहरुमा ज्वरो आउनु र शरीरमा राता विमीरा देखा पर्ने, नाकबाट पानी बग्ने, खोकी लाग्ने, आँखा रातो हुने, अँँखा पाक्नेजस्ता लक्षण देखिन्छ ।
दादुराको संक्रमण फैलिएपछि शिक्षकहरुले पनि स्वास्थ्यकर्मीहरुको परामर्शमा विद्यार्थी र अभिभावकहरुलाई दादुरा रोगको संक्रमण र त्यसबाट बच्ने उपायहरुका बारेमा जानकारी गराउन सुरु गरेको आइडियल पब्लिक स्कुल नेपालगन्जका प्रिन्सिपल बिजेन्द्र श्रीवास्तवले बताए ।
पहिलो दिन नेपालगन्जका ४ वटा खोप केन्द्रमा ८ सय ७९ जना बालबालिकालाई दादुराको खोप र भिटामिन एको क्याप्सुल खुवाइएको छ । दादुराको खोप र भिटामिन एको क्याप्सुल खुवाउने अभियानलगातार ३ दिनसम्म संचालन हुने नेपालगन्ज उप महानगरपालिका स्वास्थ्य शाखाका प्रमुख रामबहादुर चन्द्रले बताए ।
समयमै उपचार नहुँदा दादुराको संक्रमणबाट बालबालिकाको मृत्यु हुने जोखिम पनि हुन्छ । बिशेष गरी कुपोषित बालबालिकाहरुमा दादुरा संक्रमण भयो भने मृत्यु हुने जोखिम हुन्छ ।
बाँकेमा ३० जनामा एकै साथ दादुराको संक्रमण देखिएपछि सन् २०२३ सम्म नेपालबाट दादुरा रोग निवारण गर्ने लक्ष्यमा चुनौती थपिएको छ ।
