काठमाडौं–चिकित्सा विज्ञान राष्ट्रिय प्रतिष्ठान(न्याम्सले) यस वर्षको लागि खुलाएको पोस्ट ग्राजु्यट तर्फको प्रवेश परीक्षा अनिश्चितकालका लागि स्थगित भएको छ । न्याम्सले भोली (शनिवार) को लागि प्रवेश परीक्षा मिति तय गरेको थियो । स्रोतका अनुसार उपप्रधान एवं स्वास्थ्य तथा जनसंख्या मन्त्री उपेन्द्र यादवको ठाडो आदेशमा प्रवेश परीक्षा रोकिएको हो । शुक्रवार बसेको न्याम्स पदाधीकारीहरुको बैठकले परीक्षा स्थगित गर्ने निर्णय गरेको हो ।
मन्त्री यादवले सहकुलपतिको हैसीयतमा स्वास्थ्य मन्त्रीस्तरीय निर्णय गरी तत्काल परीक्षा स्थगन गर्न पत्रचार गरेका छन् । पत्रमा आवेदन खुलाइएको समय र परीक्षाको समय चाँडो भएको हुँदा इच्छुक सबैले प्रवेश परीक्षामा भाग लिन नपाएको भन्दै तत्काल रोक्न लिखित आदेश दिएका हुन् ।
मन्त्रीको लिखित आदेश आएसंगै शुक्रवार न्याम्स पदाधीकारीहरुको बैठक वसेको एक सदस्यले बताए । परीक्षा दिन भनेर देशभरबाट चिकित्सकहरु काठमाडौं आइसकेका छन् । परीक्षार्थीहरुले परीक्षा पर्झट सार्दा आफुहरुलाइ मर्का परेको भन्दै विरोधको तयारी गरेका छन् ।
यसबर्षका लागि नेपाल मेडिकल काउन्सिलले एमडी/एमडीएमएसतर्फ ११५ र डिएम/एमसीएचतर्फ २१ सिट निर्धारण गरेको छ । जसमा एमडी/एमडीएमएसतर्फ एनेस्थेसियामा १५, डर्माटोलोजीमा २, इएनटीमा ४, इन्टरनल मेडिसिनमा १५, गाइनोकोलोजीमा १४, अप्थोमोलोजीमा १७, अर्थोपेडिक्समा ८ सिट दिएको छ । त्यसैगरी पेड्रियाटिक्समा ११, साइक्याट्रिकमा १, प्थाथोलोजीमा ३, एमडिजिपीमा ३, रेडियोलोजीमा ६, रेडिएसन अंकोलोजीमा २ र जनरल सर्जरीमा १४ सिट निर्धारण गरेको छ ।
डिएममा कार्डोलोजीमा ३, गास्ट्रो इन्ट्रोलोजीमा ३, हेपोटोलोजीमा २, मेडिकल अंकोलोजीमा २, नेफ्रोलोजीमा २ सिट निर्धारण गरेको छ । त्यसैगरी, एमसिएचतर्फ न्युरो सर्जरीमा २, प्लास्टिक सर्जरीमा २, थोरासिक एण्ड भास्कुलर सर्जरीमा २, युरोलोजी २ सर्जिकल गाइनोकोलोजीमा १ सिट तोकेको छ । यस वर्ष एमडीएसतर्फ विभिन्न विद्याका लागि ७ वटा सिट निर्धारण गरेको छ ।
