पोखरा—बतास अर्गनाइजेसनले पश्चिमाञ्चल क्षेत्रीय अस्पताल पोखरालाई अक्सिजन प्लान्ट हस्तान्तरण गरेको छ । कोभिड—१९ महामारीका बेला तत्काल ल्याउने भन्दै अभियान नै चलाएर बतासले विभिन्न व्यक्तिहरुको सहयोग उठाएको थियो ।
तर, समयमा उक्त अक्सिजन प्लान्ट नआएपछि बतासको आलोचना सुरु भएको थियो । ढिलै भएपनि अर्गनाइजेसनले अक्सिजन प्लान्ट ल्याएर बुधबार अस्पताललाई हस्तान्तरण गरेको हो । उक्त प्लान्टले दैनिक १ सय ५० सिलिन्डर अक्सिजन उत्पादन गर्न सक्छ । प्लान्ट जडान भने पश्चिमाञ्चल क्षेत्रीय अस्पतालद्वारा आवश्यक पूर्वाधार निर्माण भएपश्चात हुनेछ ।
बतास फाउन्डेसन र बतास अर्गनाइजेसनबाट गरी कुल ५५ लाख रुपैयाँ बीउ पुँजी राखेर ‘रु. १०० दान गरौँ, महामारीमा प्राण राखौँ’ भन्ने नाराका साथ चलाइएको अभियानमा ३ करोड ४५ लाख १७ हजार ५ सय ५५ रुपैयाँ संकलन भएको अर्गनाइजेसनले जनाएको थियो ।
कोभिड—१८ महामारीका बेला नै ल्याइहाल्ने दाबीसहित अभियान चलाइएको भएपनि कोभिडको प्रभाव न्यून भएको अवस्थामा प्लान्ट आएको प्रति अर्गनाइजेसनले क्षमा मागेको छ । वि.सं. २०७८ सालको जेठमा नै फ्रान्समा प्लान्ट खरिद गरिसकेका तर ढुवानीमा समस्या भएको बतास फाउन्डेसनका नारायणप्रसाद पौडेलले बताए ।
