विराटनगर—सुनसरीको इटहरी—२० तरहराकी ३० वर्षीया रमा चौहानले विराटनगरस्थित विराट नर्सिङ होम (विराटनगर अस्पताल) मा जन्माएकी तिम्ल्याहा नवजात शिशुलाई हस्पिटलले बचाएको छ । हस्पिटलका वरिष्ठ नवजात तथा बालरोग विशेषज्ञ डा. दिपराज अधिकारीको नेतृत्वको १६ जनाको स्वास्थ्यकर्मीको टोलीले तिम्ल्याहा नवजात शिशुको सफल उपचार गरेर बचाएको हो ।
समय नपुगी जन्मिएको नवजात शिशुको सफल उपचार गरेर हस्पिटलले बचाएपछि बिहीबार पत्रकार सम्मेलन गरी जानकारी गराएको छ । ३ कार्तिकमा हस्पिटल भर्ना भएकी चौहानले १० कार्तिकमा तिम्ल्याहा नवजात शिशुलाई जन्म दिएकी थिइन् । चौहानले जन्म दिएका तीनै जना छोरी रहेका छन् । अस्पतालकी वरिष्ठ स्त्री, प्रसूति एवं निःसन्तान विशेषज्ञ डा. प्रेरणा दाहाल नेतृत्वको टोलीले उनको प्रसुती गराएको थियो ।
गर्भ रहेको २९ सातामै चौहानले शिशु जन्माएकी हुन् । सामान्य अवस्थामा शिशु ४० सातामा जन्मिए पनि गर्भमा २ वा त्यसभन्दा बढी शिशु रहेको अवस्थामा सामान्य गर्भावस्थामा भन्दा छिटो पैदा हुने चिकित्सकको भनाइ छ । चौहानले गर्भ रहेको २९ हप्ता पूरा भएपछि यी शिशु जन्माएकी हुन् ।
नवजात शिशुको सफल उपचार भएपछि पत्रकार सम्मेलनमा स्वास्थ्यकर्मी ।
‘समय नपुगी त्यो पनि कम तौल भएको शिशुलाई बचाउन निक्कै गाह्रो र खतरा हुने गर्दछ,’ वरिष्ठ नवजात तथा बालरोग विशेषज्ञ डा. अधिकारीले भने, ‘कम तौलको शिशुको शरीरका अंगहरू विकास भएको हुँदैन् । त्यस्ता शिशुलाई कडा खालको अक्सिनमा राख्नुपर्ने हुन्छ । बुझने भाषामा भन्नुपर्दा आमाको कोखमा राखेर उपचार गर्नुपर्ने हुन्छ ।’
तीनै जना शिशुलाई एनआईसीयू कक्षमा राखेर उपचार गरेको उनले बताए । ‘एनआईसीयूमा दुई साता राखेर उपचार गर्दा शिशुको अवस्था अहिले एकदमै राम्रो भएपछि नर्सरी वार्डमा सारेर उपचार गरिएको छ,’ उनले भने, ‘अब खतराको जोखिम मोलेर अगाडि बढेको छ । तीनै जना शिशुको अवस्था अहिले एकदमै राम्रो छ । आमाको दूध खानसक्ने भएका छन् ।’ शरीर विकास हँुदै जाने क्रम अब बढेर जाने भएकोले अबको दुई साता भित्रमा शिशुलाई डिस्चार्ज दिने उनले बताए ।
‘तिम्ल्याहा बच्चा जन्मिँदा खुसीको सीमा छैन’
रमा चौहानलले जन्म दिएकी तिम्ल्याहा शिशु
तिम्ल्याहा शिशुलाई जन्म दिएकी रमा चौहानको पहिलो सन्तान हुन् । ‘पहिलो सन्तान तिम्ल्याहा जन्माएर सकुशल रहेकोमा खुसी झन् बढेर गएको छ,’ उनले भनिन्, ‘तर, ईश्वरले जे चाहे त्यो गरे । हाम्रो लागि यो दुर्लभ खुसी हो । घरमा श्रीमान, बुवा, आमा, सबै जना खुसीले गदगद हुनुहुन्छ ।’
२९ हप्तामै जन्मिएका तीनै जना सन्तान र सपनाको स्वास्थ्य अवस्था सामान्य रहेको उनले सुनाए । चिकित्सकका अनुसार चौहान गर्भ रहेदेखि नै नियमित सम्पर्कमा रहेको बताइन् ।
