काठमाडौं-चिकित्सा शिक्षा र स्वास्थ्य सेवा सुधारको माग गर्दै अनशनरत डा. गोविन्द केसीसँग वार्ता गर्न सरकारले चार सदस्सीय समिति गठन गरेको छ । शुक्रबार प्रधानमन्त्री तथा मन्त्रिपरिषद्को कार्यलयले विज्ञप्ति जारी गर्दै प्रधानमन्त्री कार्यलयका सचिवको संयोजकत्वमा चार सदस्सीय वार्ता टोली गठन गरेको हो ।
टोलीमा स्वास्थ्य तथा जनसंख्या मन्त्रालय, शिक्षा, विज्ञान तथा प्रविधि मन्त्रालयका सचिव र नेपाल मेडिकल एशोसिएसनका प्रतिनिधी सदस्य रहनेछ ।
डा. केसीको स्वास्थ्य सेवा र शिक्षा सुधारका मागका सम्बन्धमा सरकारले सकारात्मक रहेको बताएको छ । साथै, सरकारले अनशन तोडेर वार्तामा आउन डा.केसीलाई आग्रह समेत गरेको छ ।
पाँच दिनदेखि धनगढीमा अनशनरत केसीको स्वास्थ्य अवस्था बिग्रदैं गएको छ । उनको स्वास्थ्य अवस्था बिग्रिएपछि बिहीबारबाट सेती अस्पतालमा भर्ना गरेर उपचार थालिएको छ । तर, डा. केसीको अवस्था अझ बिग्रदैं गएको छ ।
