काठमाडौं—झापास्थित प्रस्तावित बीएण्डसी मेडिकल कलेज एण्ड रिसर्च सेन्टरले ‘बीएण्डसी जीवन बचाउ अभियान’ सुरु गर्ने भएको छ । बिहीबार काठमाडौंमा पत्रकार सम्मेलन आयोजना गर्दै बीएण्डसीका कार्यकारी निर्देशक दुर्गा प्रसाईले दशैं तिहारपछि अस्पतालले ‘बीएण्डसी जीवन बचाउ अभियान’ सुरु गर्न लागेको जानकारी दिएका हुन् ।
यो योजनाअनुसार बीएण्डसीले छुट्टै उपचार प्याकेज तयार गर्नेछ । सो प्याकेजमा सोवाग्राहीले निश्चित रकम तिरेपछि ५० हजार रुपैयाँसम्मको उपचार एक वर्षसम्म गर्न पाउनेछन् । ‘यो प्याकेजमा हामी प्रति परिवारलाई ५ देखि १० हजार रुपैयाँसम्ममा उपलब्ध गराउने तयारीमा छौं,’ उनले भने, ‘यस विषयमा अन्तिम टुंगो लाग्न बाँकी छ ।’
बीएण्डसीले स्वास्थ्य बिमाअन्तर्गतको कार्यक्रम १ साउनबाट स्थगित गरेको थियो । स्थगित गर्नुअघि सरकारलाई बजेट वक्तव्यमा आएको सरकारी तथा सामुदायिक अस्पतालमा मात्र बिमा चलाउने भन्ने विषयमा बिमा बोर्डसँग जवाफ मागेको थियो ।
तर, स्वास्थ्य बिमा बोर्डले त्यसको जवाफ नदिएपछि बीएण्डसीलगायत अन्य मेडिकल कलेजहरुले १ साउनदेखि बिमा कार्यक्रम स्थगित गरेका छन् । बीएण्डसीले पुरानो बक्यौता रकम फस्र्योट गरी पुनः स्वास्थ्य बिमा संचालन गर्नका लागि स्वास्थ्य बिमा बोर्डमा निवेदन हालेको छ ।
तर, सो निवेदन हालेको झण्डै एक महिना हुँदा पनि बिमा बोर्डबाट त्यसको जवाफ नआएपछि यो कार्यक्रम सुरु गर्ने लागिएको प्रसाईले बताए । ‘झापा, इलामलगायत मेची अञ्चलमा अझै पनि बीएण्डसीमा बिमा हुन्छ भनेर नवीकरण गर्ने र नयाँलाई बिमित गर्ने क्रम जारी छ,’ उनले भने, ‘अब हामी सरकारको स्वास्थ्य बिमा चलाउँदैंनौं । आफ्नै छुट्टै कार्यक्रम चलाउँछौं । अब हाम्रो नाम बेचेर सरकारले बिमा नगरोस् ।’
