काठमाडौं—चिकित्सा शिक्षा आयोगले स्तरोन्नती भएका प्राविधिक शिक्षा तथा व्यवसायिक तालिम परिषद् (सिटिईभीटी)अन्तर्गतका ४० कलेजलाई चिकित्सा शिक्षातर्फका १८०० सिट बाँडफाँड गरेको छ । आयोगले १० भदौंमा कार्यक्रमगत सिट निर्धारण गरेको हो ।
ती ४० शैक्षिक संस्थाले चिकित्सा शिक्षाअन्तर्गतका डिप्लोमा तहका कार्यक्रम यसै शैक्षिक सत्रदेखि अध्यापन गराउन पाउनेछन् । आयोगले मापदण्ड पूरा गरेका ती शैक्षिक संस्थामा पढाउने पाउने सिट संख्या पनि निर्धारण गरिदिएको छ ।
ल्याब, रेडियोग्राफी, सामान्य चिकित्सा, सामान्य चिकित्सा—आयुर्वेद, डिप्लोमा इन फिजियो थेरापी विषय अध्यापन गराउनेछन् ।
५ फागुन २०७८ को निर्णयअनुसार आयोगबाट भएको अनुगमनमा मापदण्ड पूरा गरेका कलेजले यसै शैक्षिक सत्रबाट अध्ययन गराउने सिट संख्यासहित अनुमति पाएका छन् । मापदण्ड नपुगेका ३४ कलेजले भने यो शैक्षिक सत्रमा अध्यापन गराउन पाउने छैनन् ।
मापदण्ड नपुगेका कलेजहरुले अपुग देखिएको विवरणहरु सिटीईभिटीबाट अनुगमन गराएर अर्को शैक्षिक सत्रका लागि परिषद्बाट नै सिफारिस गरी आयोगमा निवेदन गर्नुपर्नेछ ।
