विराटनगर–विराटनगर–९ गुद्रीका एकजना बालकको उपचारका क्रममा मृत्यु भएपछि चिकित्सकले लापरवाही गरेको भन्दै बिरामीका आफन्तले मकालु एभरेष्ट हस्पिटल तोडफोड गरिदिएका छन् । विराटनगरस्थित मकालु एभरेष्ट हस्पिटलका चिकित्सकले शल्यक्रियामा लापरवाही गरेकाले ७ वर्षीय विराट पासवानको मृत्यु भएको भन्दैं मृतकका आफन्तहरूले हस्पिटल तोडफोड गरेका हुन् ।
पासवानको एपेन्डिसाइटिसको मकालु हस्पिटलमा गत २८ बैशाखमा हस्पिटलका जनरल तथा ल्याप्रोस्कोपिक सर्जन डा. अमिर अफाकले शल्यक्रिया गरेका थिए । शल्यक्रियापछि ५ जेठमा डिस्चार्ज दिएको थियो । बिरामी पासवानलाई ज्वरो र वान्ता आएपछि बिहीबार मकालु हस्पिटल लगिएको थियो ।
डा. अफाकले बिरामीको अवस्था सिकिस्त भएको भन्दै न्युरो हस्पिटलमा रेफर गरिदिएका थिए । बालक पासवानको उपचारको क्रममा शुक्रबार ३ बजे मृत्यु भएको हो । एपेन्डिसाइटिसको अप्रेशन गर्दा डा. अमिर अफाकले लापरबाही गरेको कारणले छोराको अहिले मृत्यु भएको मृतकका बावु विष्णु पासवानले बताए ।
‘छोरा बिरामी भएपछि पहिला उपचार गरेकै मकालु हस्पिटल लिएर आए । अस्पताल आउँदा चिकित्सक पनि ढिलो गरी आउनुभयो । त्यसबेलासम्म छोराले बान्ता गरिरहेको थियो,’ विष्णुले भने, ‘तीन महिना अगाडि छोराको पेटको शल्यक्रिया राम्रोसँग नगरेको कारणले यस्तो समस्या आएको हो । सिकिस्त भएपछि छोरालाई अर्को हस्पिटलमा रेफर गरिदियो । त्यसपछि छोराको ज्यान गयो ।’
सुरूमा मकालु हस्पिटलले राम्रोसँग शल्यक्रिया नगरेका कारण र चिकित्सकको लापरवाहीले छोराको मृत्यु भएको उनले आरोप लगाए । छोराको उपचारमा लापरवाही गर्ने मकालु हस्पिटलका चिकित्सकलाई कारवाही गरिनुपर्ने उनले बताए ।
यता उपचारमा संलग्न चिकिस्तक डा. अमिर अफाक उपचारमा कुनै पनि लापरबाही नगरेको दाबी गरेका छन् । ‘तीन महिना अगाडि शल्यक्रिया राम्रोसँग गरेको हो । अहिले बच्चालाई बान्ता र ज्वारो आउन थालेपछि हस्पिटल लिएर आउनुभएको थियो । बच्चाको समस्या भएका कारणले मैले अर्को हस्पिटलमा रेफर गरेको हो,’ डा. अफाकले भने, ‘मेरो तर्फबाट र हस्पिटलबाट कुनै पनि लापरवाही भएको छैन ।’
हस्पिटल तोडफोड गरेको भन्दै चार जना पक्राउ
बिरामीको मृत्यु भएपछि आक्रोशित भिडले मकालु हस्पिटल तोडफोड गरिदिएपछि प्रहरीले चारजनालाई पक्राउ गरेको छ । वडा प्रहरी कार्यालय विराटनगर ‘क’ ले शुक्रबार दिउँसो मृतकका चार जना आफन्तहरू पक्राउ गरेको हो ।
हस्पिटल तोडफोडमा संलग्न भएको भन्दै प्रहरीले रमन मण्डल, सजकुमार कमात, सीतसलाई पक्राउ गरेको मृतकका आफन्तहरूले बताएका छन् । पक्राउ परेका चार जना युवाहरूलाई जिल्ला प्रहरी कार्यालय मोरङमा राखिएको छ ।
