पोखरा—गण्डकी प्रदेश मातहतको संक्रामक तथा सरुवा रोग अस्पतालको व्यवस्थापन समितिका पदाधिकारी बर्खास्त गरेको गण्डकी प्रदेश सरकारले रविमोहन भण्डारीलाई अध्यक्ष नियुक्त गरेको छ । अन्य ३ पदाधिकारी दलगत भागबण्डामा नियुक्त भएका छन् ।
पब्लिक हेल्थमा स्नातकोत्तर गरेका भण्डारी तत्कालीन लेखनाथ लायन्स अस्पताल स्थापनाका चन्दादाता समेत रहेको बताइन्छ । सरकारी स्वास्थ्य सेवामा करिब १७ वर्ष बिताएका उनले सेभ द चिल्ड्रेनमा २३ वर्ष जनस्वास्थ्य विज्ञका रुपमा काम गरेका थिए ।
भण्डारीलाई ३ वर्षका लागि अध्यक्ष पदमा नियुक्त गर्ने निर्णय गरेको हो । नवनियुक्त अध्यक्ष भण्डारीले सेवा वृद्धि र आम नागरिक आकर्षित गर्ने र भवन बनेपछि सेवा कसरी विस्तार गर्न सकिन्छ भन्ने कुरा छलफल गरेर कार्ययोजना बनाएर अघि बढ्ने उनले योजना सुनाए । उनले आफू अध्यक्ष हुँदा चुनौती रहेको र चुनौतीको सामना गरी अघि बढ्ने उल्लेख गरे ।
अस्पताल सिईओ मोडलमा पनि जाने र व्यवस्थापन समिति मोडल पनि हुने यो अवस्था अलि नमिलेको जस्तो उनलाई लागेको छ । ‘समितिको रोल अस्पतालमा लिडिङभन्दा पनि सपोर्टिङ खालको हुनेछ,’ उनले भने ।
एमाले सरकारले नियुक्त गरेका ४ पदाधिकारी हटाउने उद्देश्यले गण्डकी प्रदेश सरकारले गत चैत १८ गते स्पष्टीकरण सोध्ने निर्णय गरेको थियो । तोकिएको समयसीमाभित्रै तत्कालीन अध्यक्ष प्रा.डा. कृष्णप्रसाद पौडेलले स्पष्टीकरण बुझाएका थिए ।
पौडेलले प्रदेश सरकारले सोधेको स्पष्टीकरण दूराशयपूर्ण र राजनीतिक दाउपेच भएको भन्दै धारणासमेत सार्वजनिक गरेका थिए । त्यसलगत्तै बिहीबारको मन्त्रिपरिषद् बैठकले बर्खास्त गर्ने निर्णय गरेको थियो । तर, यसबारे शुक्रबारमात्रै सार्वजनिक भयो ।
यता, बर्खास्तीमा परेका अध्यक्ष प्रा.डा. कृष्णप्रसाद पौडेल स्वास्थ्यजस्तो संवेदनशील क्षेत्रमा पनि राजनीति चलखेल भएको भन्दै आफूहरु अदालत जाने बताइरहेका छन् । व्यवस्थापन समिति गठन आदेश बनेको ७ महिनापछि गठन भएको समिति १ वर्ष पूरा नहुँदै विघटन भएको छ । गठनादेशअनुसार समिति पदाधिकारीको कार्यकाल ३ वर्षको हुने र आफूहरुले पूरा कार्यकाल सेवा गर्न पाउनुपर्नेमा पौडेलले जिकीर उनले गरे ।
